షార్జా లాంటి చిన్న మైదానంలో 126 పరుగుల లక్ష్యఛేదన నల్లేరుపై నడకేనని అంతా ఊహించారు. కానీ.. శనివారం రాత్రి ఆ లక్ష్యాన్ని కూడా ఛేదించలేక సన్రైజర్స్ హైదరాబాద్ బోల్తా కొట్టింది. ప్లేఆఫ్ రేసులో నిలవాలంటే తప్పక గెలవాల్సిన మ్యాచ్లో సమష్టిగా పోరాడిన పంజాబ్ బౌలర్లకి.. ఆఖరి బంతి వరకూ టెన్షన్ తప్పలేదు. దానికి కారణం ఒకే ఒక్కడు జేసన్ హోల్డర్. హైదరాబాద్ టీమ్ 13 ఓవర్లు ముగిసే సమయానికి 60/5తో నిలిచిన దశలో క్రీజులోకి వచ్చిన (47 నాటౌట్: 29 బంతుల్లో 5x6) ఆఖరి బంతి వరకూ తన పవర్ హిట్టింగ్తో పంజాబ్ టీమ్కి చెమటలు పట్టించేశాడు. అంతకముందు బౌలింగ్లోనూ 4 ఓవర్లు వేసిన హోల్డర్ 19 పరుగులిచ్చి మూడు వికెట్లు పడగొట్టడం విశేషం. దాంతో.. మ్యాచ్లో హైదరాబాద్ 5 పరుగుల తేడాతో ఓడినా.. హోల్డర్కే మ్యాన్ ఆఫ్ ద మ్యాచ్ అవార్డు లభించింది. క్రీజులోకి వచ్చిన తర్వాత తొలి ఏడు బంతులకీ 5 పరుగులే చేసిన జేసన్ హోల్డర్.. ఇన్నింగ్స్ 15వ ఓవర్ వేసిన స్పిన్నర్ రవి బిష్ణోయ్ బౌలింగ్లో ఒక సిక్స్తో టాప్గేర్లోకి వెళ్లాడు. ఆ తర్వాత ఓవర్ వేసిన నాథన్ ఎలిస్ బౌలింగ్లోనూ బ్యాక్ టు బ్యాక్ సిక్సర్లు బాదిన జేసన్ హోల్డర్.. ఐదు బంతుల వ్యవధిలోనే మూడు సిక్సర్లతో ఒక్కసారిగా హైదరాబాద్ని మళ్లీ మ్యాచ్లోకి తెచ్చాడు. ఇన్నింగ్స్ 18వ ఓవర్లోనూ షమీ బౌలింగ్లో ఒక సిక్స్ బాదిన హోల్డర్.. మ్యాచ్లో హైదరాబాద్ని గెలిపించేలా కనిపించాడు. కానీ.. చివరి 12 బంతులలో 21 పరుగులు అవసరమైన దశలో హోల్డర్ ఒత్తిడికి గురయ్యాడు. ఇన్నింగ్స్ 19వ ఓవర్ వేసిన అర్షదీప్ సింగ్.. తొలి బంతికే రషీద్ ఖాన్(3)ని ఔట్ చేయగా.. ఆ ఓవర్లో రెండు బంతులే ఆడిన హోల్డర్ ఒక పరుగే చేశాడు. మొత్తంగా.. ఆ ఓవర్లో 4 పరుగులే రావడంతో మ్యాచ్ ఒక్కసారిగా పంజాబ్ వైపు మొగ్గింది. మ్యాచ్లో టర్నింగ్ పాయింట్ కూడా ఈ ఓవరే. ఆ తర్వాత చివరి ఓవర్లో హైదరాబాద్ విజయానికి 17 పరుగులు అవసరమవగా.. రెండో బంతికి హోల్డర్ సిక్స్ కొట్టడంతో పంజాబ్లో టెన్షన్ మొదలైంది. కానీ.. ఆ తర్వాత రెండు బంతులకీ ఒక పరుగు కూడా ఇవ్వని బౌలర్ నాథన్ ఎలిస్.. అనంతరం ఒక వైడ్ వేసి.. ఐదో బంతికి రెండు పరుగులు ఇవ్వడంతో మళ్లీ టెన్షన్. చివరి బంతికి ఆరు పరుగులు చేస్తే..? స్కోర్లు సమమై సూపర్ ఓవర్ జరిగే ఛాన్స్ కనిపించింది. కానీ.. ఆఖరి బంతిని స్లో ఫుల్ టాస్ రూపంలో ఎలిస్ విసరగా.. హోల్డర్ లాంగాన్ దిశగా హిట్ చేశాడు. కానీ.. ఆ బంతికి సింగిలే వచ్చింది. దాంతో.. ఐదు పరుగుల తేడాతో పంజాబ్ గెలిచి ఊపిరి పీల్చుకుంది.
0 Comments