డాక్టర్ దశరథరామ్.. గతంలో విశాఖ ఆంధ్ర యూనివర్శిటీ ప్రాథమిక ఆరోగ్య కేంద్రంలో వైద్యుడిగా సేవలందించారు. కొడుకు ఆదరించకపోవడంతో దిక్కులేని వ్యక్తిగా కూతుళ్లతో కలిసి రోడ్డు పక్కన జీవితం వెళ్లదీస్తున్నారు. ఏయూలో మెడికల్ అధికారిగా విధులు నిర్వర్తించిన డాక్టర్ కె.దశరథరామ్కు కుమారుడు మధు, కుమార్తెలు సుధ , పుణ్య ఉన్నారు. కుమార్తెలను బంధువులకే ఇచ్చి పెళ్లిళ్లు చేయగా.. చిన్నకుమార్తెకు మతిస్థిమితం లేదు. కొంతకాలం తరువాత ఇద్దర్ని భర్తలు వదిలేశారు. అప్పటి నుంచి తండ్రి దగ్గరే ఉంటుండగా.. దశరథరామ్ పదవీ విరమణ అనంతరం మద్దెలపాలెంలో సొంతంగా క్లినిక్ నడిపారు. దశరథరామ్ తన ఇద్దరు కూతుళ్లత కొన్నాళ్లు కుమారుడి దగ్గర ఉన్నారు. వీరి తీరు నచ్చని కొడుకు, కోడలు ముగ్గుర్ని వృద్ధాశ్రమంలో చేర్పించారు. అక్కడ ఎక్కువ కాలం ఉండలేక బయటకు వచ్చి అద్దె ఇంట్లో ఉంటున్నారు. మతిస్థిమితం లేని చిన్న కుమార్తె గొడవ చేస్తుండడంతో చుట్టుపక్కలవారు ఫ్లాట్ యజమానికి ఇంటి యజమానికి ఫిర్యాదు చేశారు. దీంతో శనివారం ఉదయం ఖాళీ చేయించారు. చుట్టుపక్కల ఎక్కడా ఇల్లు అద్దెకు దొరక్కపోవడంతో సామాన్లు తీసుకుని రోడ్డున పడ్డారు. సమీపంలోని ఓ షాపు దగ్గర ఆశ్రయం పొందారు. ఆదివారం ఉదయం స్థానిక రేషన్ డిపో డీలర్ లక్ష్మణ్ వీరి గురించి జీవీఎంసీ కమిషనర్కు సమాచారం ఇచ్చారు. వెంటనే స్పందించిన కమిషనర్ సృజన డాక్టర్ దశరథరామ్ కుమారుడితో మాట్లాడారు. తాము వాళ్లతో ఇమడలేకపోతున్నామని చెప్పారు. దీంతో ఆమె యూడీసీ పీడీ శ్రీనివాస్ను అక్కడకు పంపించి పూర్తి వివరాలు తెలుసుకున్నారు. సోమవారం ఉదయం వీరిని మానిసిక చికిత్సాలయానికి తరలిస్తామని చెప్పారు. ప్రస్తుతం అసలేం జరుగుతుందో తెలియని స్థితిలో ఆయన ఉన్నారు.. ఉద్యోగ జీవితం గురించి తప్ప ఇతర విషయాలేవీ గుర్తులేవంటున్నారు. మెరైన్ ఇంజనీర్గా పనిచేసిన తన కుమారుడు ప్రస్తుతం హైదరాబాద్లో ఒక మల్టీనేషనల్ కంపెనీలో మేనేజర్గా పనిచేస్తున్నాడన్నారు. కోడలు మాట విని తనను, కూతుళ్లను చూడడం లేదు. తమకు ఎక్కడైనా చిన్నపాటి గూడు కల్పిస్తే చాలు అన్నారు. భార్య మరణం తర్వాత దశరథరామ్ మానసికంగా కుంగిపోయారని స్థానికులు అంటున్నారు. ఆరునెలల క్రితం వరకు ఆయన ప్రాక్టీస్ కొనసాగించారని.. డాక్టర్ అవస్థలు చూసి స్థానికులు ఎంతో కొంత సాయం చేస్తున్నారంటున్నారు. డా.దశరథరామ్ కష్టాలను చూసి అందరూ చలించిపోతున్నారు.
0 Comments