ఏపీ హైకోర్టులో ఓ పిటిషన్పై విచారణ ఆసక్తికరంగా మారింది. డ్రైవింగ్ లైసెన్స్ విషయంలో కోర్టు కీలక వ్యాఖ్యలు చేసింది. పోలీసులు డ్రైవింగ్ లైసెన్స్ చూపించలేదంటూ ఓ ఫొటో తీసి.. ఆ ఆధారంగా చలాన్ చెల్లించాలంటూ ఒత్తిడి చేయడంపై హైకోర్టు ఆశ్చర్యం వ్యక్తం చేసింది. డ్రైవింగ్ లైసెన్స్ లేదనడానికి ఫొటో ఎలా సాక్ష్యం అవుతుందని ప్రశ్నించింది. కృష్ణాజిల్లా మొవ్వకు చెందిన తాతినేని లీలాకృష్ణ హైకోర్టులో పిటిషన్ దాఖలు చేశారు. లైసెన్స్ చూపలేదన్న కారణంతో పాటు హెల్మెట్ పెట్టుకోలేదని, మొబైల్ మాట్లాడుతూ వాహనం నడుపుతున్నానన్న కారణాలతో చల్లపల్లి పోలీసులు తనకు చలాన్ విధించడాన్ని సవాలు చేశారు. ఏపీ హైకోర్టులో ఈ పిటిషన్పై బుధవారం విచారణ జరిపారు. పిటిషనర్ డ్రైవింగ్ లైసెన్స్ చూపలేదని ఆరోపిస్తున్న పోలీసులు.. అందుకు వారు తీసిన ఫొటోను సాక్ష్యంగా చూపుతున్నారని పిటిషనర్ తరపు న్యాయవాది వాదనలు వినిపించారు. పోలీసులు చూపుతున్న ఫొటో లైసెన్స్ అడిగిన దానికి సాక్ష్యం కాదన్నారు. పోలీసులు చూపుతున్న ఫొటోలోని వ్యక్తి పిటిషనర్ కాదన్నారు. ఆ వాహనం కూడా పిటిషనర్ది కాదని.. కేవలం వాహన నంబర్ మాత్రమే పిటిషనర్కు చెందిందన్నారు. పోలీసులు రోజూ ఫోన్ చేస్తూ చలాన్ చెల్లించాలని ఒత్తిడి చేస్తున్నారని ఆరోపించారు. మోటారు వాహన చట్ట నిబంధలను ఉల్లంఘిస్తే బాధ్యులపై చార్జిషీట్ దాఖలు చేసే అవకాశాన్ని చట్టం కల్పిస్తుందని న్యాయమూర్తి గుర్తు చేశారు. ఫోన్ చేసి చలాన్ మొత్తం చెల్లించాలంటూ ఒత్తిడి ఎలా చేస్తారంటూ నిలదీసింది. ఈ మొత్తం వ్యవహారంలో కౌంటర్ దాఖలు చేయాలని హోంశాఖ ముఖ్య కార్యదర్శి, డీజీపీ, కృష్ణా జిల్లా ఎస్పీని ఆదేశించింది. తదుపరి విచారణను మూడు వారాలకు వాయిదా వేసింది.
0 Comments