ప్రైవేట్ వాహనంలో ఈవీఎం తరలింపు.. కరీంనగర్‌లో ఉద్రిక్తత

హుజురాబాద్‌లో ఉపఎన్నిక పోలింగ్ ముగిసిన తర్వాత ఈవీఎంల తరలింపులో గందరగోళం నెలకొంది. ఓ పోలింగ్ కేంద్రం నుంచి ఈవీఎంను ప్రైవేట్ వాహనంలో తరలిస్తుండగా కాంగ్రెస్, బీజేపీ కార్యకర్తలు అడ్డుకున్నారు. ఈవీఎంలు భద్రపరుస్తున్న కరీంనగర్‌లోని ఎస్ఆర్ఆర్ కాలేజీ వద్దకు ఓ ఈవీఎంను ప్రైవేట్ వాహనంలో అధికారులు తీసుకొచ్చారు. ఈ విషయం తెలుసుకున్న కాంగ్రెస్, బీజేపీ కార్యకర్తలు ఆ వాహనాన్ని అడ్డుకున్నారు. ఆర్టీసీ బస్సులో తరలించాల్సిన ఈవీఎంను మరో వాహనం ఎందుకు తీసుకొచ్చారని అధికారులను నిలదీశారు. హుజూరాబాద్‌ కాంగ్రెస్‌ అభ్యర్థి బల్మూరి వెంకట్‌ సైతం పార్టీ శ్రేణులతో కలిసి వాహనాన్ని అడ్డుకున్నారు. Also Read: అయితే జమ్మికుంట వద్ద బస్సు పంక్చర్ కావడంతోనే మరో వాహనంలో తీసుకొచ్చినట్లు అధికారులు వివరణ ఇవ్వగా ఆందోళనకారులు వినిపించుకోలేదు. ఎన్నికల అధికారులు అధికార పార్టీతో కుమ్మక్కై ఈవీఎంలు మార్చేస్తున్నారని ఆరోపించారు. చివరికి పోలీసులు రంగప్రవేశం చేసి నచ్చజెప్పడంతో వివాదం సద్దుమణిగింది. అయితే టైర్ పంక్చర్‌ కావడంతో బస్సును జమ్మికుంట వద్ద ఆపారంటూ వీడియోలు సోషల్‌మీడియాలో వైరల్‌గా మారాయి. ఈ వీడియోలను కాంగ్రెస్‌, బీజేపీ నాయకులు ఎన్నికల కమిషనర్‌కు పంపారు. మరోవైపు ఈవీఎంను తరలిస్తున్న వ్యక్తిని పోలీసులు అదుపులోకి తీసుకుని విచారిస్తున్నారు.