ప్రారంభమైన మున్సిపల్ ఎన్నికల పోలింగ్.. కోవిడ్ నిబంధనలు పక్కా అమలు

తెలంగాణలో రెండు కార్పొరేషన్లు, ఐదు మున్సిపాలిటీల్లో శుక్రవారం ఉదయం పోలింగ్‌ ప్రారంభమైంది. ఎన్నికల ప్రక్రియ ఉదయం 7 గంటల నుంచి సాయంత్రం సాయంత్రం 5 గంటల వరకు బ్యాలెట్‌ పద్ధతిలో కొనసాగనుంది. వరంగల్, ఖమ్మం మున్సిపల్‌ కార్పొరేషన్లతో పాటు అచ్చంపేట, సిద్ది పేట, జడ్చర్ల, కొత్తూరు, నకిరేకల్‌ మున్సిపాలిటీలకు, కొన్ని మున్సిపాలిటీలలోని ఒక్కొక్క వార్డుకు ఈ పోలింగ్‌ జరుగుతోంది. అధికారులు కోవిడ్‌ నిబంధనల మేరకు పోలింగ్‌ కేంద్రాల వద్ద పకడ్బందీ ఏర్పాట్లు చేశారు. ఎన్నికల ఏర్పాట్లపై రాష్ట్ర ఎన్నికల సంఘం గురువారం జిల్లా కలెక్టర్లు, పోలీసు కమిషనర్లు, ఎస్పీలు, జిల్లా వైద్య ఆరోగ్యశాఖ అధికారులు, పురపాలక కమిషనర్లతో వీడియో కాన్ఫరెన్స్‌ నిర్వహించింది. ఈ ఎన్నికల్లో హైకోర్టు ఉత్తర్వులకు అనుగుణంగా కొవిడ్‌ నిబంధనలను పకడ్బందీగా అమలు చేయాలని రాష్ట్ర ఎన్నికల కమిషనర్‌(ఎస్‌ఈసీ) సి.పార్థసారథి అధికారులను ఆదేశించారు. పోలింగ్‌ నిర్వహణ, ఓట్ల లెక్కింపు రోజున పాటించాల్సిన కోవిడ్‌–19 నిబంధనలపై పలు సూచనలు చేశారు. మే 3న లెక్కింపు ఈ ఎన్నికల ఓట్ల లెక్కింపును మే 3న చేపట్టనున్నారు. ఉదయం 8 గంటలకు ప్రారంభమయ్యే ఓట్ల లెక్కింపు, ఆ తర్వాత ఫలితాల ప్రకటన ఏర్పాట్లపై కూడా అధికారులకు రాష్ట్ర ఎన్నికల సంఘం పలు సూచనలు చేసింది. పోలింగ్ కేంద్రం వద్ద నిబంధనలు * పోలింగ్‌ కేంద్రం వద్ద ప్రతి ఒక్కరు తప్పనిసరిగా మాస్క్‌ ధరించాలి * అన్ని పోలింగ్‌ కేంద్రాల పరిసరాలను శానిటైజ్‌ చేయాలి * పోలింగ్‌ కేంద్రంలోకి ప్రవేశిస్తున్న సమయంలోనూ, బయటికి వచ్చేటప్పుడూ చేతులను శానిటైజ్‌ చేసుకోవాలి. దీనికోసం శానిటైజర్లను సిద్ధంగా ఉంచాలి. * భౌతిక దూరం పాటించేలా పోలింగ్‌ కేంద్రాల బయట వలయాలను మార్క్‌ చేసి, భౌతిక దూరం పర్యవేక్షణకు ఒక పోలీస్‌ కానిస్టేబుల్‌ నియామకం * భౌతిక దూరం పాటించేలా పోలింగ్‌ సిబ్బంది, ఏజెంట్ల సీటింగ్‌ * సిబ్బంది, పోలీసులు విధిగా మాస్క్‌ లు, ఫేస్‌ షీల్డులు, గ్లౌజులు ధరించాలి. వీలును బట్టి ఎన్‌–95 మాస్క్‌ లేదా రెండు మాస్కులు ధరించాలి. * కోవిడ్‌–19 నిబంధనల అమలుకు ప్రతి మునిసిపాలిటీలో ఒకరు లేదా ఇద్దరు హెల్త్‌ నోడల్‌ అధికారుల నియామకం. * ప్రతి కేంద్రంలో ఒకరు లేదా ఇద్దరు ఆరోగ్య సిబ్బంది మెడికల్‌ కిట్లతో సిద్ధంగా ఉండాలి. * అంబులెన్సులను ఆక్సిజెన్‌ సిలిండర్‌లతో సిద్ధంగా ఉంచాలి * రిసెప్షన్‌లో ఎక్కువ కౌంటర్లు ఏర్పాటు చేసి ఒకే సమయంలో 10 మందికి మించకుండా ఉండేలా చూడాలి. * నలుగురికంటే ఎక్కువ మంది ఒక్కచోట చేరకుండా చూడాలి. అవసరమైతే 144 సెక్షన్‌ విధించాలి. కౌంటింగ్‌ సమయంలో... * కౌంటింగ్‌ హాల్స్‌ విశాలమైన గదులలో ఏర్పాటు చేయాలి. ఒక్క కౌంటింగ్‌ హాల్లో 50 మందికి మించి ఉండొద్దు. * కౌంటింగ్‌ సిబ్బంది, ఏజెంట్లు భౌతిక దూరం పాటించేలా సీటింగ్‌ ఏర్పాటు చేయాలి. * మాస్కులు ధరించి, ఎప్పటికప్పుడు శానిటైజర్‌తో చేతులు శుభ్రపరచుకునేలా చూడాలి. * జలుబు, దగ్గు, జ్వరంతో బాధ పడుతున్న వారిని కౌంటింగ్‌ హాల్లోకి అనుమతించరాదు. * అవసరమైన వారికి పీపీఈ కిట్లు అందుబాటులో ఉంచాలి.