ఆనందయ్య మందుకు అనుమతి అప్పుడే.. వైసీపీ ఎమ్మెల్యే కీలక వ్యాఖ్యలు

నెల్లూరు జిల్లా కృష్ణపట్నానికి చెందిన ఆయుర్వేద వైద్యుడు బొనిగి ఆనందయ్య కరోనా మందుపై ఉత్కంఠ కొనసాగుతోంది. ఆయుష్ శాఖ అధ్యయనం.. కోర్టు తీర్పులతో మందు పంపిణీకి అనుమతులు వస్తాయా? లేదా అనే అనుమానాలు రేగుతున్నాయి. ఈ నేపథ్యంలో ఎమ్మెల్యే కీలక వ్యాఖ్యలు చేశారు. ఆనందయ్య మందుకు రెండు రోజుల్లో ప్రభుత్వ అనుమతి వచ్చే అవకాశాలున్నాయని సర్వేపల్లి ఎమ్మెల్యే కాకాణి గోవర్థన్‌రెడ్డి అన్నారు. శనివారం ఇస్కపాళెం పీహెచ్‌సీలో జరుగుతున్న వ్యాక్సినేషన్‌ ప్రక్రియను పరిశిలించిన అనంతరం మీడియాతో మాట్లాడారు. ఈ సందర్భంగా కరోనా సోకిన వారి వివరాలు, వారికి అందిస్తున్న వైద్యం, పారిశుధ్య నిర్వహణపై తీసుకుంటున్న చర్యలపై అధికారులతో సమీక్షించారు. ఆనందయ్య మందుపై వివాదాలు సృష్టించేందుకు కొంతమంది పనిగట్టుకొని రాజకీయ రగడ సృష్టిండానికి ప్రయత్నం చేస్తున్నారని ఆరోపించారు. అయినా ప్రభుత్వం సంయమనం పాటిస్తుందని అన్నారు. ప్రభుత్వ అనుమతి రాగానే ఆనందయ్య ఆధ్వర్యంలోనే కరోనా మందును తయారుచేసి సర్వేపల్లి నియోజకవర్గంలోని ప్రతి కుటుంబానికి పంపిణీ చేస్తామని పేర్కొన్నారు. ఆనందయ్యను శుక్రవారం ఇంటి వద్ద దించిన పోలీసులు శనివారం తెల్లవారుజామున ప్రత్యేక బందోబస్తుతో ఆయన్ని రహస్య ప్రాంతానికి తరలించారు. ఔషధం కోసం ఇతర ప్రాంతాల నుంచి కృష్ణపట్నానికి భారీగా జనం తరలివస్తుండగా.. వారిని పోలీసులు అడ్డుకుంటున్నారు. ఆ గ్రామస్తులకు చెందిన వాహనాలను తప్ప బయటి వ్యక్తుల వాహనాలను అనుమతించడం లేదు. మే 21 నుంచి ఆనందయ్య మందు పంపిణీని ప్రభుత్వం నిలిపివేసిన సంగతి తెలిసిందే. ఔషధంపై నివేదిక వచ్చే వరకు ఆనందయ్యను రహస్య ప్రాంతంలోనే ఉంచనున్నారు. తాజా పరిణామాలతో కృష్ణపట్నంలో 144 సెక్షన్‌ అమలు చేస్తున్నారు. మరోవైపు కరోనా మందు ఫార్మలా చెప్పాలని కొందరు అధికారులు తనను వేధిస్తున్నారంటూ ఆనందయ్య హైకోర్టును ఆశ్రయించారు.