ఏపీ ప్రజలకు అలర్ట్.. దీపావళి రోజు ఈ సమయంలోనే టపాసులు కాల్చాలి!

ఏపీలో దీపావళి పండుగను జాగ్రత్తగా జరుపుకోవాలంటోంది కాలుష్య నియంత్రణ మండలి. దీపావళి పండుగ రోజు రాత్రి 8-10 గంటల మధ్య మాత్రమే టపాసులు కాల్చాలని కాలుష్య నియంత్రణ మండలి ఛైర్మన్‌ ఏకే పరీడా అన్నారు. కేవలం గ్రీన్‌ క్రాకర్స్‌‌తో పండుగ నిర్వహించుకోవాలని.. కొవిడ్‌ మూడో దశ హెచ్చరికలతో రాష్ట్ర ప్రభుత్వం ఈ మేరకు నిర్ణయం తీసుకుందని తెలిపారు. దీనికి సంబంధించి ఇప్పటికే జిల్లా కలెక్టర్లు, ఎస్పీలు, ఇతర శాఖలకు ఆదేశాలు జారీ చేశామన్నారు. ఈ మేరకు శుక్రవారం ఆయన ఓ ప్రకటన విడుదల చేశారు. ప్రజారోగ్యాన్ని దృష్టిలో పెట్టుకుని పర్యావరణ పరిరక్షణలో భాగంగా ప్రజలెవరూ మామూలు టపాసులు కాల్పొద్దని అన్నారు. సాధారణ వాటితో పోలిస్తే హరిత టపాసులు తక్కువ మోతాదులో బూడిద, కాలుష్య కారక వాయువులు, శబ్దం, పొగ విడుదల చేస్తాయన్నారు. ప్రజలు ప్రస్తుతం ఉన్న పరిస్థితుల్ని అర్థం చేసుకుని తమకు సహకరించాలని కోరారు. ఆ నిర్ణీత సమయంలోనే టపాసులు కాల్చుకోవాలని సూచించారు.