తిరుమల: శ్రీవారి భక్తులకు మరో శుభవార్త.. గ్రీన్ సిగ్నల్ వచ్చేసింది, త్వరలోనే

శ్రీవారి భక్తులకు శుభవార్త. తిరుమల కొండపైకి వెళ్లే భక్తులతోపాటు తిరుపతి పరిసరాల్లోని ప్రయాణికుల సౌలభ్యం కోసం ఎలక్ట్రిక్‌ బస్సులను త్వరలో తిప్పనుంది. దీనికి సంబంధించి కేంద్రం నుంచి అనుమతి కూడా లభించింది. ఏపీఎస్ ఆర్టీసీ పంపించిన ప్రతిపాదనలకు ఓకే చెప్పిందని ఎండీ ద్వారకా తిరుమలరావు తెలిపారు. త్వరలోనే ఈ ప్రాజెక్ట్ అలాట్‌మెంట్ ఆర్డర్ బస్సుల్ని నడిపే బిడ్డర్‌కు అందజేస్తామన్నారు. తిరుమలకు 50 బస్సులు, తిరుపతి నుంచి రేణిగుంట, మదనపల్లి, చిత్తూరు, కడప ప్రాంతాలకు మరో 50 బస్సులు నడుపుతారు. పర్యావరణ కాలుష్యాన్ని నివారిస్తూ ప్రయాణికులకు మెరుగైన రవాణా అందించాలన్న లక్ష్యంతో కేంద్రం రాయితీతో ఎలక్ట్రికల్ బస్సులు ఇస్తోంది. ఇందుకుగాను ప్రభుత్వం ప్రైవేటు ట్రాన్స్‌పోర్టర్ల నుంచి బస్సులను అద్దె ప్రాతిపదికన తీసుకోనుంది. ఎలక్ట్రికల్ బస్సులు నడపడంపై ఎప్పటి నుంచో ప్రతిపాదనలు ఉన్నా పలు కారణాలతో ఆలస్యమవుతూ వస్తోంది. అయితే ఎట్టకేలకు ఈ బస్సులు రోడ్డెక్కేందుకు మార్గం సుగమమైంది. గతేడాది వారం రోజుల పాటు ఒక ఎలక్ట్రికల్ బస్సును ప్రయోగాత్మకంగా తిరుపతి నుండి తిరుమలకు, తిరుమల నుండి తిరుపతికి టీటీడీ నడిపింది. 32 మంది కూర్చునే విధంగా చాలా చక్కగా అందంగా ఈ బస్సును అశోక్ లైలాండ్ సంస్థ తయారు చేసింది. ఈ బస్సును నడిపేందుకు అధికారులు అనుభవజ్ఞులైన ఆర్టీసీ డ్రైవర్‌లకు ప్రత్యేక శిక్షణ కూడా ఇచ్చారు. ఇప్పుడు కేంద్రం నుంచి గ్రీన్ సిగ్నల్ రావడంతో త్వరలోనే బస్సులు తిరుమల ఘాట్ రోడ్డులో పరుగులు పెట్టనున్నాయి.