రాజకీయాల్లో చేరిన భారత టెన్నిస్ దిగ్గజం లియాండర్ పేస్.. కెరీర్‌లో ఎన్నో ఘనతలు

భారత టెన్నిస్ దిగ్గజం రాజకీయాల్లో చేరాడు. డబుల్స్‌లో అత్యుత్తమ ఆటగాడిగా కితాబులు అందుకున్న లియాండర్ పేస్.. ఆటకి రిటైర్మెంట్ ప్రకటించి.. అనూహ్యరీతిలో తృణమూల్‌ కాంగ్రెస్‌ పార్టీలో చేరుతున్నట్లు తాజాగా ప్రకటించాడు. 1991లో ప్రొఫెషనల్ ఆటగాడిగా మారిన లియాండర్ పేస్.. ఈ మూడు దశాబ్దాల్లో ఎన్నో ఘనతలు సాధించాడు. ఈ 30 ఏళ్లలో ఏకంగా ఏడు ఒలింపిక్స్‌లో పాల్గొన్న లియాండర్ పేస్.. ఈ ఘనత సాధించిన తొలి టెన్నిస్ ప్లేయర్‌గా ఇప్పటికీ రికార్డుల్లో కొనసాగుతున్నాడు. 17 ఏళ్ల వయసులోనే ప్రొఫెషనల్ టెన్నిస్ ఆటగాడిగా మారిన లియాండర్ పేస్.. 1996 అట్లాంటా ఒలింపిక్స్‌లో కాంస్యం నెగ్గాడు. అప్పటికి అతని వయసు 22 ఏళ్లే. ఆ తర్వాత కూడా లియాండర్ పేస్ జోరు టెన్నిస్‌లో కొనసాగింది. 10 మిక్సెడ్ డబుల్స్, 8 పరుషుల డబుల్స్ గెలిచిన ఈ టెన్నిస్ దిగ్గజం.. కెరీర్‌లో మొత్తం 18 గ్రాండ్‌స్లామ్ టైటిళ్లు ఖాతాలో వేసుకున్నాడు. ఇక డేవిస్ కప్‌ హిస్టరీలోనే ఆల్‌టైమ్ విజయాల రికార్డ్‌ కూడా లియాండర్ పేస్ పేరిట ఉంది. అతను 45 డబుల్స్ విజయాలతో టాప్‌లో ఉన్నాడు. నూనూగు మీసాల వయసులో కెరీర్‌ని ప్రారంభించిన లియాండర్ పేస్.. 48 ఏళ్ల వయసులో రాకెట్‌ని వదిలేస్తున్నాడు. ఈ సుదీర్ఘ కెరీర్‌లో అతను సాధించిన విజయాలకిగానూ.. దేశ క్రీడా అత్యున్నత పురస్కారం ఖేల్‌రత్న, మూడో అత్యున్నత పౌర పురస్కారం పద్మ భూషణ్ లభించింది.