బద్వేల్ ఉప ఎన్నికకు ప్రారంభమైన పోలింగ్

కడప జిల్లా బద్వేలు అసెంబ్లీ నియోజకవర్గ ఉప ఎన్నికకు పోలింగ్ మొదలైంది. శనివారం ఉదయం 7 గంటల నుంచి సాయంత్రం 7 గంటల వరకు పోలింగ్‌ కొనసాగనుంది. ఎన్నికలో వైసీపీ అభ్యర్థి డాక్టరు దాసరి సుధ, బీజేపీ అభ్యర్థి పనతల సురేష్, కాంగ్రెస్‌ అభ్యర్థి, మాజీ ఎమ్మెల్యే కమలమ్మతో పాటు మరో 12 మంది అభ్యర్థులు పోటీలో ఉన్నారు. పోలింగ్‌కు అన్ని ఏర్పాట్లు పూర్తిచేశామని, ఓటర్లందరూ నిర్భయంగా ఓటు హక్కును వినియోగించాల్సిందిగా రాష్ట్ర ప్రధాన ఎన్నికల అధికారి కె. విజయానంద్‌ విజ్ఞప్తి చేశారు. నియోజకవర్గంలో ఓటున్న ప్రతీ ఒక్కరూ ఓటు వేయాలన్నారు. మొత్తం పోలింగ్‌ ప్రక్రియను వీడియో రికార్డింగ్‌తోపాటు వెబ్‌క్యాస్టింగ్‌ కూడా చేస్తున్నారు. ఎలాంటి అవాంఛనీయ సంఘటనలు జరకుండా ఎస్పీ కేకేఎన్‌ అన్బురాజన్‌ పర్యవేక్షణలో భారీ బందోబస్తు ఏర్పాటు చేశారు. బద్వేలు నియోజకవర్గంలో మొత్తం ఓటర్లు 2,15,292 కాగా... వారిలో పురుషులు 1,07,915 మంది, మహిళలు 1,07,355 మంది, థర్డ్‌ జండర్‌ 22 మంది ఉన్నారు. 2019ఎన్నికల్లో బద్వేలు అసెంబ్లీ నియోజకవర్గానికి సంబంధించి 77.64 శాతం పోలింగ్‌ నమోదైంది. అప్పట్లో 2,04,618 ఓట్లు ఉండగా 1,58,863 ఓట్లు పోలయ్యాయి.