ఏపీలో పొలిటికల్ హీట్ కొనసాగుతోంది. పట్టాభి వ్యాఖ్యలు, కార్యాలయంపై దాడి వ్యవహారంతో ఒక్కసారిగా నేతల మధ్య మాటల యుద్ధం నడిచింది. ఆ తర్వాత ఈ పంచాయితీ ఢిల్లీకి చేరింది. టీడీపీ అధినేత ముఖ్య నేతలతో రాష్ట్రపతిని కలిసి జగన్ సర్కార్‌పై ఫిర్యాదు చేశారు. కూడా టీడీపీకి కౌంటర్‌గా ఎన్నికల సంఘానికి ఫిర్యాదు చేసింది. తెలుగుదేశం పార్టీ గుర్తింపును రద్దు చేయాలని.. ఢిల్లీలో కేంద్ర ఎన్నికల సంఘం ప్రధాన కమిషనర్‌ సుశీల్‌చంద్రను వైసీపీ నేతలు విజ్ఞప్తి చేశారు. రాష్ట్రంలో టీడీపీ నేతలు తప్పుడు ప్రచారం చేస్తూ, అసభ్యకరమైన భాష మాట్లాడుతున్నారని ఆరోపించారు. టీడీపీ నేతలు అసభ్యకరమైన పదజాలంతో.. రాజ్యాంగబద్ధంగా, ప్రజల ద్వారా ఎన్నికైన రాజ్యాంగ వ్యవస్థను తిట్టడం దారుణమన్నారు. చంద్రబాబు, లోకేష్, టీడీపీ నేతలు ముఖ్యమంత్రిని, పోలీసు అధికారులను, ప్రభుత్వ అధికారులను, ప్రజాప్రతినిధులను అసభ్య పదజాలంతో దూషించారని ఫిర్యాదు చేశారు. వారిపై చట్టబద్ధంగా చర్యలు తీసుకోవాలని కోరారు. టీడీపీ నేతలు ఉపయోగిస్తున్న భాష, అసాంఘిక చర్యలు వివరించామని ఎంపీ విజయసాయిరెడ్డి అన్నారు. ఆ పార్టీ గుర్తింపును రద్దు చేయాలని ఎన్నికల కమిషన్‌కు విజ్ఞప్తి చేశామన్నారు. మరోవైపు టీడీపీ అధినేత చంద్రబాబుపై కేంద్ర హోంశాఖ మంత్రి అమిత్‌షాకు వైఎస్సార్‌సీపీ ఎంపీ గోరంట్ల మాధవ్‌ ఫిర్యాదు చేశారు. హోంశాఖపై పార్లమెంటరీ స్థాయీ సంఘానికి హాజరైన ఎంపీ.. అమిత్‌షాకు మాధవ్‌ వినతిపత్రమిచ్చారు. చంద్రబాబుకు ప్రజాస్వామ్యం అంటే ఏంటో నేర్పించాలని.. ప్రజలు తిరస్కరించినా ఇంకా అధికారం చలాయించాలని చూస్తున్నారని మండిపడ్డారు. ప్రజాస్వామ్యంపై బోధించే స్కూల్‌ను కేంద్ర హోంశాఖ ఏర్పాటు చేసి.. చంద్రబాబుకు విద్యాబోధన చేయాలని అమిత్‌షాను కోరానన్నారు. చంద్రబాబు స్కూల్‌ ఆఫ్‌ అఫెన్సివ్‌ లాంగ్వేజ్‌ ప్రమోషన్‌ ఈ పనిలోనే ఉందన్నారు.
0 Comments