ఇటీవల నగరంలో గంజాయి స్మగ్లింగ్ కేసులు పెరిగిపోవడంతో పోలీసులు ముమ్మరం చేశారు. అనేక ప్రాంతాల్లో కార్లు, బైకులు, ఇతర వాహనాలను ఆపి క్షుణ్ణంగా తనిఖీలు చేపడుతున్నారు. అయితే మూడు రోజుల క్రితం కొన్ని ప్రాంతాల్లో పోలీసులు చూపిన అత్యుత్సాహం తీవ్ర విమర్శలకు దారితీసింది. వాహనదారుల సెల్‌ఫోన్లను లాక్కున్న పోలీసులు వారి వాట్సాప్ ఛాటింగులను కూడా చెక్ చేయడంపై చాలామంది అసహనానికి గురవుతున్నారు. తమ ప్రైవసీకి భంగం కలిగించే హక్కు పోలీసులకు ఎవరిచ్చారని నెటిజన్లు నిలదీస్తుండగా, గంజాయి, డ్రగ్స్ సరఫరాను అరికట్టే భాగంగానే తాము అలా చేయాల్సి వచ్చిందని పోలీసులు వివరణ ఇస్తున్నారు. అయితే డ్రగ్స్, గంజాయి కోసం తనిఖీల సమయంలో పౌరుల వాట్సాప్ చాట్‌లపై నిఘా పెట్టడం నిబంధనలకు విరుద్ధం అంటూ నగరానికి చెందిన డేటా, ప్రైవసీ పరిశోధకుడు కె.శ్రీనివాస్ హైదరాబాద్‌ పోలీస్‌ కమిషనర్‌ అంజనీకుమార్‌కు తాజాగా లీగల్ నోటీసులు పంపారు. వెస్ట్‌జోన్‌ ప్రాంతంలో డ్రగ్స్ సంబంధిత తనిఖీల సమయంలో స్మార్ట్‌ఫోన్లు చూపించాలంటూ పోలీసు అధికారులు స్థానిక ప్రజలను కోరినట్లు వీడియోలు వైరల్‌ అయ్యాయి. వీటి ఆధారంగా సీపీకి లీగల్ నోటీసులు పంపారు. ‘అక్టోబరు 27న మంగళ్‌హాట్‌, ధూల్‌పేట్‌, జుమేరాత్‌ బజార్‌ ప్రాంతాల్లో తనిఖీలు చేస్తున్న పోలీసులు చట్టవిరుద్ధమైన చర్యలకు పాల్పడినట్లు తక్షణమే గుర్తించాలని నోటీసులో కోరారు. పాదచారులు, బైకర్లు, ఆటో డ్రైవర్ల వంటి సాధారణ పౌరులను ఆపడానికి, మొబైల్‌ ఫోన్లను తెరవమని ఆదేశించడానికి పోలీసులకు ఎలాంటి అధికారాలు లేవని తెలిపారు. పోలీసులు సహేతుకమైన కారణం లేకుండా పౌరుల వ్యక్తిగత స్వేచ్ఛకు భంగం కలిగించడం అధికారాన్ని దుర్వినియోగం చేయడమే శ్రీనివాస్ పేర్కొన్నారు.
0 Comments