పిల్లలు జీవితంలో ఉన్నత స్థాయిలో ఉంటే తల్లిదండ్రుల ఆనందానికి హద్దు లేదు. వేలు పట్టుకుని నడిపించిన బిడ్డలు తమే గౌరవించాల్సిన ఉన్నత స్థితికి వారు చేరుకుంటే తల్లిదండ్రులకు ఎంత గౌరవం, ప్రేమ, గర్వం. ఇటీవల కాలంలో ఉద్యోగ రీత్యా కొడుకును తండ్రి గౌరవించడం, ఉన్నతాధికారి అయిన కుమార్తెకు తండ్రి సెల్యూట్ చేయడం వంటివి ఎన్నో భావోద్వేగ సన్నివేశాలను చూశాం. ఓ తండ్రికి కూడా అలాంటి ఆనందమే కలిగింది. తన కంటే ఉన్నతస్థాయికి ఎదిగిన కొడుకుని చూసి మురిసిపోయారు.. గౌరవంతో సెల్యూట్ చేశారు. హైదరాబాద్ హకీమ్‌పేట్‌లోని నేషనల్ ఇండ్రస్ట్రీయల్ సెక్యూరిటీ అకాడమీలో ఘనంగా పాసింగ్ ఔట్ పరేడ్ జరిగింది. 34వ బ్యాచ్ సీఐఎస్ఎఫ్ అసిస్టెంట్స్ కమాండెంట్‌లు 62 మంది పాసింగ్ ఔట్ పరేడ్‌లో పాల్గొన్నారు. జిల్లా నంద్యాల ట్రాఫిక్‌ ఏఎస్‌ఐగా పని చేస్తున్న వెంకటేశ్వర్లు కుమారుడు గౌతమ్‌ కూడా అసిస్టెంట్‌ కమాండెంట్‌ అధికారి (డీఎస్పీస్థాయి)గా శిక్షణ పూర్తిచేసుకున్నారు. ASI వెంకటేశ్వర్లు తనకన్నా ఉన్నత హోదా పొందిన కుమారుడిని చూసి తండ్రి మురిసిపోయారు. కుమారుడికి సెల్యూట్ చేసి ఆనందాన్ని పంచుకున్నారు. ఈ సన్నివేశం చూపరులను ఆకట్టుకుంది. ASI వెంకటేశ్వర్లు స్వగ్రామం కర్నూలు జిల్లాలోని మహానంది మండలం ఎం.తిమ్మాపురం. గౌతమ్‌ 2015లో బీటెక్‌ను పూర్తి చేసి.. 2018-19లో ఢిల్లీలో అసిస్టెంట్‌ కమాండెంట్‌ విభాగానికి సంబంధించి పరీక్షలు రాసి అర్హత సాధించారు.
0 Comments