ఇవాళ తెలంగాణ కేబినెట్ భేటీ... లాక్ డౌన్‌లో సడలింపులు ?

తెలంగాణలో లాక్ డౌన్ కొనసాగుతోంది. కరోనా వైరస్ కేసులు పెరుగుతున్న నేపథ్యంలో మహమ్మారి కట్టడిలో భాగంగా చేపట్టిన లాక్‌డౌన్ కఠినంగా అమలు చేస్తున్నారు. మే 12 నుంచి లాక్‌డౌన్ కొనసాగుతోంది. ఉదయం 6 నుంచి 10 గంటల వరకు మాత్రమే అన్ని వర్తక, వ్యాపారాలు, కార్యకలాపాలకు అనుమతి ఇస్తున్నారు. ఆ తర్వాత అత్యవసర సేవలు మినహా ఎలాంటి వాటికి అనుమతి ఇవ్వడంలేదు. రోజులో 20 గంటలు లాక్‌డౌన్ విధిస్తున్నారు. అయితే ఇవాల్టి నుంచి లాక్ డౌన్‌కు విధించిన గడువు పూర్తి కానుంది. ఈ నేపథ్యంలో తెలంగాణ కేబినెట్ ఇవాళ భేటీ కానుంది. లాక్‌డౌన్‌ను పొడిగిస్తారా? లేదంటే కరోనా కేసులు తగ్గాయని సడలింపులు ఇస్తారా? అనే చర్చ జరుగుతోంది. అయితే దీనిపై ఇవాళ తెలంగాణ ప్రభుత్వం నిర్ణయం తీసుకోనుంది. మధ్యాహ్నం 2 గంటలకు సీఎం కేసీఆర్ అధ్యక్షతన తెలంగాణ మంత్రి మండలి సమావేశం కానుంది. ఈ సమావేశంలో పలు అంశాలపై కీలకంగా చర్చించనున్నారు. అయితే రాష్ట్రంలో ఆంక్షల సడలింపు సమయం పెంచి లాక్‌డౌన్‌ను మరికొంత కాలం పొడిగించే అవకాశం ఉందని ప్రభుత్వ వర్గాల నుంచి సమాచారం. అయితే ఉదయం వేళల్లో సడలింపు పెంచే అవకాశం ఉందంటున్నారు. అంతేకాకుండా ఉదయం నుంచి సాయంత్రం వరకు ఆంక్షలు ఎత్తివేసి, రాత్రి కర్ఫ్యూ విధించే ఛాన్స్కూడా ఉందని ప్రభుత్వవర్గాలు అభిప్రాయపడుతున్నాయి. మరోవైపు వైద్యారోగ్య శాఖ తరుఫున మాత్రం ఇప్పటిలాగే లాక్‌డౌన్ పొడిగించాలని సూచించినట్లు తెలుస్తోంది. ఈ అంశాలన్నింటిపై కేబినెట్ భేటీలో సుదీర్ఘంగా చర్చించి నిర్ణయం తీసుకుంటారని తెలుస్తోంది.ీ