‘సెబ్ అధికారుల అరాచకాలపై సజ్జలకు చెప్పినా మార్పు రాలే’.. వైసీపీ ఎమ్మెల్యే సంచలన వ్యాఖ్యలు

అధికారులపై వెంకటగిరి ఎమ్మెల్యే సంచలన వ్యాఖ్యలు చేశారు. నియోజకవర్గంలో సెబ్‌ అధికారుల తీరు, వారి అరాచకాలు దారుణంగా ఉన్నాయని ఆనం మండిపడ్డారు. శనివారం వెంకటగిరిలో ట్రాక్టర్‌, ప్రొక్లెయిన్‌ యజమానులు, భవన నిర్మాణ కార్మికులతో ఆయన సమావేశం నిర్వహించారు. ఈ సందర్భంగా రామనారాయణరెడ్డి మాట్లాడుతూ.. గృహ నిర్మాణాలకు అవసరమైన ఇసుక దొరకడం లేదని అన్నారు. అధికారులు చెప్పిన ఇతర ప్రాంతాల నుంచి ఇసుక తీసుకువచ్చే క్రమంలో కేసులు నమోదు చేయడం దారుణమని మండిపడ్డారు. ట్రాక్టర్‌ను పట్టుకున్న ప్రతిసారి రూ.15 వేల వరకు ఖర్చవ్వడమే కాకుండా, నెల మామూళ్లు ఇవ్వాల్సి వస్తోందని ఆయన ఆరోపించారు. తప్పుడు కేసులు నమోదు చేసి ఇబ్బందులు పెడుతున్నారని ఎమ్మెల్యే ధ్వజమెత్తారు. సెబ్‌ అధికారుల అరాచకాలు తట్టుకోలేకనే ట్రాక్టర్‌, ప్రొక్లెయిన్‌ యజమానులు రోడ్డుపైకి వచ్చారని ఆయన దుయ్యబట్టారు. వాగులు, వంకల నుంచి ఇసుక తీసుకెళ్తున్నా కేసులు నమోదు చేయడం సరికాదని అసహనం వ్యక్తం చేశారు. ఈ విషయమై రెండు నెలల కిందట ప్రభుత్వ సలహాదారు సజ్జల రామకృష్ణారెడ్డికి వివరించామని తెలిపారు. సెబ్‌ జేడీతో సమీక్షించి మరోసారి ఇలా జరగకుండా చర్యలు చేపడతామని ఆయన హామీ ఇచ్చారు, కానీ అధికారుల్లో మార్పు రాలేదన్నారు. మట్టిని తరలిస్తున్న ట్రాక్టర్‌ను పట్టుకుని ఇసుక తరలిస్తున్నట్లు కేసు నమోదు చేయాలంటూ సెబ్‌ అధికారులు పోలీసులకు సూచించడం విడ్డూరంగా ఉందని విమర్శించారు. రాష్ట్ర డైరెక్టర్ల సూచనతో శనివారం చేపట్టాల్సిన నిరసనను వాయిదా వేసినట్టు ఎమ్మెల్యే రామనారాయణరెడ్డి తెలిపారు.