సమాజం తమను తక్కువగా చూసినా కష్టంలో ఉన్న పెద్దోళ్ల ఆకలిని గుర్తించారు ఆ హిజ్రాలు. సమాజం నుంచి తమకు ఎలాంటి ఆదరణ లేకపోయినా దిక్కుతోచక వృద్ధాశ్రమంలో బతుకీడుస్తున్న పండుటాకులకు ఆదరవుగా నిలిచారు. కడుపు నిండా అన్నం పెట్టి అన్నపూర్ణ అనిపించుకున్నారు అర్థనారీశ్వరులు. అందరి అభినందనలు అందుకుంటున్నారు. జిల్లా అశ్వారావుపేట పట్టణానికి చెందిన హిజ్రాలు తమ మానవతా హృదయాన్ని చాటుకున్నారు. పట్టణంలోని కోనేరు బజారులో ఉన్న అమ్మ సేవా సదనంలో ఉంటున్న వృద్ధులకు అన్నదానం చేశారు. తమ పెద్దవాళ్లను గుర్తు చేసుకుంటూ వృద్ధులకు అన్నదానం చేయాలని అనుకున్నామని.. దిశ ఫౌండేషన్‌తో పేదలకు సేవలందిస్తోన్న భారతి సాయంతో అన్నదానం ఏర్పాటు చేసినట్లు హిజ్రాలు తెలిపారు. అన్నదానం చేయడం తమకు సంతోషంగా ఉందని అన్నారు. ఇంత మంచి ఆలోచనతో ముందుకొచ్చిన వారిని మనస్ఫూర్తిగా అభినందిస్తున్నానని దిశ ప్రొటెక్షన్ వెల్పేర్ ఫౌండేషన్ జిల్లా అధ్యక్షురాలు వేముల భారతి అన్నారు. సమాజంలో ప్రతిఒక్కరూ వారిని గౌరవించాల్సిన అవసరం ఉందన్నారు. ఇలాంటి గొప్ప కార్యక్రమంలో తమను భాగస్వాములను చేసినందుకు సంతోషంగా ఉందని.. అన్నదానం చేసిన వారందరికీ కృతజ్ఞతలు తెలిపారు. ఈ కార్యక్రమంలో రాధ, సేవా సదన్ సభ్యులు పాల్గొన్నారు. Also Read:
0 Comments