IPL 2021: ఐపీఎల్ 2021 సీజన్‌లో రాయల్ ఛాలెంజర్స్ బెంగళూరు టీమ్‌కి ఆడుతున్న కేఎస్ భరత్.. వరుసగా రెండో మ్యాచ్‌లోనూ సత్తాచాటాడు. రాజస్థాన్ రాయల్స్‌తో దుబాయ్ వేదికగా బుధవారం రాత్రి జరిగిన మ్యాచ్‌లో 35 బంతుల్లో 3x4, 1x6 సాయంతో 44 పరుగులు చేసిన కేఎస్ భరత్.. బెంగళూరు విజయంలో క్రియాశీలక పాత్ర పోషించాడు. మరీ ముఖ్యంగా.. 150 పరుగుల ఛేదనలో విరాట్ కోహ్లీ (25) ఔటైన తర్వాత మాక్స్వెల్ (50 నాటౌట్)తో కలిసి మూడో వికెట్‌కి భరత్ నెలకొల్పిన 69 పరుగుల భాగస్వామ్యం రాజస్థాన్‌కి మ్యాచ్‌ని దూరం చేసింది. మ్యాచ్ చేజారిపోతుండటాన్ని గ్రహించిన రాజస్థాన్ రాయల్స్ ఫాస్ట్ బౌలర్ క్రిస్ మోరీస్, రాహుల్ తెవాటియా.. ఉద్దేశపూర్వకంగానే కేఎస్ భరత్‌పై స్లెడ్జింగ్‌కి దిగారు. అయితే.. మౌనంగా తన బ్యాటింగ్‌ని కొనసాగించిన కేఎస్ భరత్.. క్రిస్ మోరీస్ హద్దులు దాటడంతో.. ఇన్నింగ్స్ 13వ ఓవర్‌లో ఓ భారీ సిక్స్‌తో సమాధానమిచ్చాడు. ఆఫ్ స్టంప్‌ లైన్‌పై పడిన బంతిని మోకాలిని కిందకి వచ్చి కేఎస్ భరత్ బలంగా హిట్ చేశాడు. షాట్ అతను ఆశించిన విధంగా కనెక్ట్ అవడంతో.. 81 మీటర్ల దూరం వెళ్లి స్టేడియం పైకప్పుని తాకింది. దాంతో.. కొత్త బంతి కోసం బౌండరీ లైన్ వెలుపల ఉన్న ఫోర్త్ అంపైర్‌ని ఫీల్డ్ అంపైర్ పిలిచాడు. కేఎస్ భరత్ ఆ తరహాలో సిక్స్ కొట్టడంతో బిత్తరపోయిన క్రిస్ మోరీస్.. తన మాటల దాడిని మరింత పెంచాడు. దాంతో.. నాన్‌స్ట్రైక్ ఎండ్‌లోని గ్లెన్ మాక్స్వెల్ చొరవ తీసుకుని మోరీస్‌కి వార్నింగ్ ఇచ్చాడు. యువ క్రికెటర్‌పై అలా నోరు జారొద్దని హెచ్చరించాడు. ఈ మ్యాచ్‌లో చివరికి బెంగళూరు 7 వికెట్ల తేడాతో విజయాన్ని అందుకోగా.. మ్యాచ్ తర్వాత కేఎస్ భరత్ ఇన్నింగ్స్‌పై కెప్టెన్ విరాట్ కోహ్లీ ప్రశంసల వర్షం కురిపించాడు.
0 Comments