అనంతపురం: వైసీపీ ఎమ్మెల్యేపై సీఐ వ్యాఖ్యలు.. పార్టీ కార్యకర్తా అంటూ, వీడియో వైరల్

అనంతపురం జిల్లాలో వైసీపీ ఎమ్మెల్యేపై సీఐ వ్యాఖ్యలు ఆసక్తికరంగా మారాయి. గుంతకల్లు ఎమ్మెల్యే వెంకట్రామిరెడ్డిని సింహంతో పోల్చుతూ పొగడ్తల్లో ముంచెత్తారు. ‘మన ఎమ్మెల్యే సింహంలాంటోడు. ఎవరికి ఎలాంటి సాయం చేయాలో మన ఎమ్మెల్యే సార్ చేస్తాడు. అడగక పోయినా సాయం చేసే వాడే లీడర్’ అంటూ ప్రశంసలు కురిపించారు. అధికార పార్టీ ఎమ్మెల్యే ఓ విధంగా పట్ల స్వామి భక్తి చూయించారు. ఈ వీడియో సోషల్ మీడియాలో వైరల్ అవుతోంది. ఒక పోలీస్ ఆఫీసర్‌లా కాకుండా అధికార పార్టీ కార్యకర్తలా సీఐ రాము మారిపోయి ఎమ్మెల్యేని పొగిడారని నెటిజన్లు, ప్రతిపక్ష పార్టీలు విమర్శిస్తున్నాయి. గుత్తిలో జరిగిన ఓ ప్రైవేట్ కార్యక్రమంలో గుంతకల్లు ఎమ్మెల్యే వెంకటరామిరెడ్డి పాల్గొన్నారు. ఆ కార్యక్రమానికి హాజరైన గుత్తి సీఐ రాము.. ఎమ్మెల్యే పనితీరును ప్రశంసించారు. ఈ వీడియో సామాజిక మాధ్యమాల్లో వైరల్‌గా మారింది. సీఐ రాము చేసిన వ్యాఖ్యల్ని, ఆయన తీరును అందరూ తప్పుబడుతున్నారు.