ఆంధ్రప్రదేశ్‌ ప్రభుత్వ తీరుపై జనసేనాని తీవ్రస్థాయిలో మండిపడుతున్న నేపథ్యంలో ఏపీ రాజకీయాలు మొత్తం ఆయన చుట్టూనే తిరుగుతున్నాయి. పవన్ వ్యాఖ్యలకు ఏపీ మంత్రులు గట్టిగానే కౌంటర్ ఇస్తుండగా మధ్యలో సినీనటుడు పోసాని కృష్ణ మురళి ప్రవేశించి ఈ వ్యవహారాన్ని మరింత ముదిరేలా చేశారు. ఆయన హైదరాబాద్‌లో ప్రెస్‌మీట్ పెట్టిన పోసానిపై జనసేన కార్యకర్తలు దాడికి యత్నించడంతో పంచాయతీ పోలీస్‌స్టేషన్‌ వరకు వెళ్లింది. పవన్‌పై పోసాని చేసిన వ్యాఖ్యలపై జనసేన కార్యకర్తలు హైదరాబాద్‌ పోలీసులకు ఫిర్యాదు చేయడంతో కేసు నమోదైంది. తాజాగా ఈ వ్యవహారం సైబరాబాద్‌‌కు చేరింది. హైదరాబాద్‌లోని పలు ప్రాంతాల్లో జనసేన కార్యకర్తలపై వైఎస్సార్‌ కాంగ్రెస్‌ పార్టీ నిఘా పెట్టిందని, దీంతో తమకు ప్రాణహాని ఉందని, రక్షణ కల్పించాలంటూ సైబరాబాద్‌ సీపీ స్టీఫెన్‌ రవీంద్రను జనసేన వీరమహిళా విభాగం కోరింది. దీంతో పాటు జనసేన పార్టీ అధినేత పవన్ కల్యాణ్‌, ఆయన కుటుంబంపై తీవ్ర వ్యాఖ్యలు చేసిన సినీనటుడు పోసాని కృష్ణ మురళిపై కఠిన చర్యలు తీసుకోవాలని డిమాండ్‌ చేసింది. ఈ మేరకు సైబరాబాద్‌ సీపీ స్టీఫెన్‌ రవీంద్రకు ఫిర్యాదు చేసింది. జనసేన వీరమహిళా నాయకురాలు ఎం.కావ్య ఆధ్వర్యంలో సుమారు 20 మంది మహిళా కార్యకర్తలు బుధవారం హైదరాబాద్‌, గచ్చిబౌలిలోని సైబరాబాద్‌ పోలీస్‌ కమిషనరేట్‌కు వచ్చి సీపీ స్టీఫెన్‌ను కలిశారు. మహిళనూ కించపరిచే విధంగా పోసాని మాట్లాడారని, జనసేన మహిళా కార్యకర్తల మనోభావాలు దెబ్బతినేలా మాట్లాడిన ఆయనపై చట్టప్రకారం చర్యలు తీసుకోవాలని ఫిర్యాదులో పేర్కొన్నారు. అనంతరం జనసేన పార్టీ కార్యాలయంలో మీడియాతో మాట్లాడిన కావ్య.. పోసాని కృష్ణమురళిని తెలంగాణ నుంచి బహిష్కరించాలని డిమాండ్‌ చేశారు. జనసేనానిపై నోటకొచ్చినట్లు మాట్లాడితే తెలంగాణలో పోసానిని తిరగనివ్వమని హెచ్చరించారు.
0 Comments