శ్రీలంకతో కొలంబో వేదికగా గురువారం రాత్రి జరిగిన ఆఖరి టీ20లో అటు బ్యాటింగ్, ఇటు బౌలింగ్‌లో తడబడింది. దాంతో.. 7 వికెట్ల తేడాతో సునాయాస విజయాన్ని అందుకున్న ఆతిథ్య శ్రీలంక.. మూడు టీ20ల సిరీస్‌ని కూడా 2-1తో చేజిక్కించుకుంది. ఇటీవల ముగిసిన మూడు వన్డేల సిరీస్‌ని మాత్రం టీమిండియా 2-1తో గెలిచిన విషయం తెలిసిందే. మ్యాచ్‌లో టాస్ గెలిచి మొదట బ్యాటింగ్ చేసిన టీమిండియా.. శ్రీలంక స్పిన్నర్ హసరంగ (4/9) దెబ్బకి నిర్ణీత 20 ఓవర్లలో 8 వికెట్ల నష్టానికి 81 పరుగులే చేయగలిగింది. భారత్ జట్టులో కుల్దీప్ యాదవ్ (23 నాటౌట్: 28 బంతుల్లో) టాప్ స్కోరర్‌గా నిలవగా.. వైస్ కెప్టెన్ భువనేశ్వర్ కుమార్ (16: 32 బంతుల్లో) అత్యధిక బంతులు ఆడాడు. లక్ష్యఛేదనలో శ్రీలంకకి ఓపెనర్లు అవిష్కా ఫెర్నాండో (12), మినోద్ భానుక (18) మెరుగైన ఆరంభమివ్వగా.. వరుస ఓవర్లలో ఇద్దరినీ భారత స్పిన్నర్ రాహుల్ చాహర్ పెవిలియన్‌కి పంపాడు. కానీ.. భారత బౌలర్ల నుంచి అతనికి సపోర్ట్ కరవైంది. మూడో స్థానంలో వచ్చిన సమరవిక్రమ (6) కూడా రాహుల్ చాహర్ బౌలింగ్‌లోనే బోల్తా కొట్టాడు. అయితే.. అతను మినహా టీమిండియా బౌలర్ ఎవరూ కనీసం ఒక వికెట్ కూడా పడగొట్టలేకపోయారు. చివర్లో ధనంజయ డిసిల్వా (23 నాటౌట్: 20 బంతుల్లో 2x4), హసరంగ (14 నాటౌట్: 9 బంతుల్లో 1x4) సమయోచిత ఇన్నింగ్స్ ఆడటంతో శ్రీలంక 14.3 ఓవర్లలోనే 82/3తో విజయాన్ని అందుకుంది. ఈ మ్యాచ్‌తో శ్రీలంక గడ్డపై భారత్ పర్యటన ముగిసింది. మ్యాచ్‌లో టాస్ గెలిచిన టీమిండియా కెప్టెన్ శిఖర్ ధావన్ మరో ఆలోచన లేకుండా బ్యాటింగ్ ఎంచుకున్నాడు. కానీ.. ఇన్నింగ్స్ మొదటి ఓవర్‌లోనే శిఖర్ ధావన్ (0) డకౌటవగా.. అనంతరం వచ్చిన దేవదత్ పడిక్కల్ (9: 15 బంతుల్లో 1x4), సంజు శాంసన్ (0), నితీశ్ రాణా (6: 15 బంతుల్లో) తేలిపోయారు. వీరితో పాటు ఓపెనర్ రుతురాజ్ గైక్వాడ్ (14: 10 బంతుల్లో 2x4) కూడా నిరాశపరచడంతో.. భారత్ జట్టు 9 ఓవర్లు ముగిసే సమయానికి 36/5తో ప్రధాన బ్యాట్స్‌మెన్‌ల వికెట్లు చేజార్చుకుంది. ఈ దశలో కాసేపు క్రీజులో నిలిచిన భువనేశ్వర్ కుమార్, కుల్దీప్ యాదవ్ జోడీ.. ఆరో వికెట్‌కి 19 పరుగుల భాగస్వామ్యం నెలకొల్పింది. కానీ.. టీమ్ స్కోరు 55 వద్ద భువీ ఔటవగా.. అనంతరం వచ్చిన రాహుల్ చాహర్ (5), వరుణ్ చక్రవర్తి (0) ఇలా వచ్చి అలా వెళ్లిపోయారు. చివర్లో కుల్దీప్‌తో కలిసి చేతన్ సకారియా (5 నాటౌట్: 9 బంతుల్లో) భారత్ ఆలౌటవకుండా అడ్డుపడ్డాడు. టీ20ల్లో భారత్ జట్టుకి ఇది మూడో అత్యల్ప స్కోరు. 2008లో ఆస్ట్రేలియాపై 74 పరుగులే చేసిన టీమిండియా.. 2016లో న్యూజిలాండ్‌పై 79 పరుగులకే ఆలౌటైంది. భారత్ తుది జట్టులో ఈ మ్యాచ్‌కి ఒక మార్పు జరిగింది. గాయపడిన ఫాస్ట్ బౌలర్ నవదీప్ సైనీ స్థానంలో మరో ఫాస్ట్ బౌలర్ సందీప్ వారియర్‌ని తీసుకున్నారు. సందీప్‌కి ఇదే ఫస్ట్ ఇంటర్నేషనల్ టీ20 మ్యాచ్. కృనాల్ పాండ్యాకి మంగళవారం కరోనా పాజిటివ్‌గా తేలడంతో.. అతనితో క్లోజ్ కాంటాక్ట్‌లో ఉన్న ఆటగాళ్లు పృథ్వీ షా, ఇషాన్ కిషన్, హార్దిక్ పాండ్య, సూర్యకుమార్ యాదవ్, తదితరులు ఐసోలేషన్‌కి పరిమితమయ్యారు. దాంతో ఈ మ్యాచ్‌కి కూడా రుతురాజ్ గైక్వాడ్, శిఖర్ ధావన్, దేవదత్ పడిక్కల్, సంజు శాంసన్, నితీశ్ రాణా రూపంలో కేవలం ఐదుగురు ప్రొఫెషనల్ బ్యాట్స్‌మెన్‌లతో భారత్ ఆడింది.
0 Comments