శ్రీకాకుళం: చోరీకి వెళ్లిన దొంగల అతి తెలివి.. కానీ అడ్డంగా బుక్కయ్యారు

శ్రీకాకుళం జిల్లాలో దొంగలు రెచ్చిపోయారు. అర్థరాత్రి ఆలయంలో ప్రవేశించిన స్వామివారి హుండీలను ఎత్తుకెళ్లారు. రాజాం రోడ్‌లోని శ్రీ షిరిడిసాయి మందిరంలో తెల్లవారుజామున 3 గంటల సమయంలో ఆలయ ప్రధాన ద్వారం తాళం పగలగొట్టిన దొంగలు.. ఆలయంలోని హుండీలను ఎత్తుకెళ్ళాడు. కొంతదూరం వెళ్లిన తరువాత హుండీలను పగలగొట్టి అందులోని నగదు, కానుకలను దోచుకొన్నారు. హుండీలను అక్కడే పడేసి వెళ్లారు. దొంగలు స్వామివారి నగలు దాచి ఉంచిన పెట్టెను కూడా పగలగొట్టి అందులోని దాదాపు రూ.2లక్షల రూపాయల విలువగల ఆభరణాలు దోచుకెళ్లారు. ఉదయం ఆలయం తెరిచేందుకు వచ్చిన ఆలయ అర్చకులు తలుపులు తీసి ఉండడంతో షాకయ్యారు. హుండీలు, ఆభరణాలు లేకపోవడతో వెంటనే పోలీసులకు సమాచారమిచ్చారు. పోలీసులు సీసీ కెమెరాలు పరిశీలించగా దొంగతనం జరిగిన విధానం మొత్తం రికార్డయింది. కేసు నమోదు చేసిన పోలీసులు దర్యాప్తు చేస్తున్నారు. దొంగలు అతి తెలివిని ప్రదర్శించారు. హుండీలు అక్కడే పగులగొడితే పోలీసులకు ఆధారాలు దొరకుతాయని భావించారు. అందుకే హుండీలను బయటకు మోసుకొచ్చి పగులగొట్టారు. కానీ చోరీ జరిగిన సీన్ మొత్తం కెమెరాల్లో రికార్డు కావడంతో అడ్డంగా దొరికిపోయారు. సీసీ ఫుటేజ్ ఆధారంగా పోలీసులు కేసును దర్యాప్తు చేస్తున్నారు.