ఆక్సిజన్ లెవల్స్ పెరిగిన.. తగ్గని టెన్షన్.. కోవిడ్ పేషంట్ ఆత్మహత్య

కరోనా బారిన పడి కోలుకొన్నా.. ఆందోళనతో ఆస్పత్రి భవనంపై నుంచి దూకి ఆత్మహత్య చేసుకున్నాడు. ఈ ఘటన వరంగల్ ఎంజీఎం ఆస్పత్రిలో చోటు చేసుకుంది. వరంగల్‌ రూరల్‌ జిల్లా సంగెం మండలకేంద్రానికి చెందిన రాయపురం లింగమూర్తి (34)కరోనా బారిన పడ్డాడు. ఈ నెల 24న కోవిడ్‌తో తీవ్ర అస్వస్థతకు గురికావడంతో ఎంజీఎం ఆస్పత్రిలో చేరాడు. అయితే అప్పటికీ ఆయన ఆక్సిజన్ లెవల్స్ 66 ఉన్నాయి. అయితే ఆరు రోజుల్లో 93కు పెరిగాయి. అయినా రెండు రోజులుగా లింగ మూర్తి తీవ్ర మానసిక ఆందోళన చెందుతున్నాడు. శుక్రవారం తెల్లవారుజామున 3 గంటల సమయంలో ఆస్పత్రి భవనం రెండో అంతస్తునుంచి కిందకు దూకాడు. తలకు తీవ్ర గాయాలు కావడంతో వైద్యులు అతనికి చికిత్స అందిస్తున్న క్రమంలోనే మృతిచెందాడు. మరో రెండు రోజులు చికిత్స పొందితే అతను కోలుకుని ఇంటికి వెళ్లేవాడని ఎంజీఎం అధికారులు తెలిపారు.