అన్నా, చెల్లి అంటూ ఇల్లు అద్దెకు తీసుకుని.. ఆ ఒక్క మిస్డ్ కాల్‌తో.. విజయవాడ బీటెక్ యువతి కేసులో షాకింగ్ నిజాలు!

విజయవాడలో ఇంజినీరింగ్‌ విద్యార్థిని అనుమానాస్పద స్థితిలో మృతి చెందిన కేసులో సంచలన నిజాలు వెలుగులోకి వచ్చాయి. ప్రియుడు పెళ్లి చేసుకోనని తెగేసి చెప్పడంతో యువతి మనస్తాపంతో ఆత్మహత్య చేసుకున్నట్లు తెలుస్తోంది. పోలీసులు తెలిపిన వివరాల మేరకు పశ్చిమ గోదావరి జిల్లా టి.నరసాపురం మండలం తెడ్లం గ్రామానికి చెందిన కంకిపాటి మున్నీ (21) విజయవాడలో బీటెక్‌ ఫైనల్ ఇయర్ చదువుతోంది. కరోనా నేపథ్యంలో ఇంటి వద్దే ఉంటూ ఆన్‌లైన్‌లోనే తరగతులకు హాజరవుతోంది. అయితే, ఖమ్మం జిల్లా సత్తుపల్లికి చెందిన కొవ్వాడ తరుణ్‌.. తెడ్లంలో ఉంటున్న తన సోదరి ఇంటికి గతేడాది వచ్చాడు. అక్క కుటుంబానికి చెందిన ఈ- సేవ కేంద్రంలో పని చేసేవాడు. ఈ క్రమంలో కాలేజీలో తన చదువుకు సంబంధించిన ప్రాజెక్టు పని మీద మున్నీ తరచూ అక్కడకు వచ్చేది. ఈ క్రమంలో వాళ్లిద్దరికీ పరిచయం ఏర్పడి ప్రేమకు దారితీసింది. ఈ నెలలో పరీక్షలు ఉన్నాయని ఇంట్లో చెప్పిన మున్నీ విజయవాడకు వచ్చింది. ఖాళీగా ఉండడం ఎందుకని, ఓ ప్రైవేటు సంస్థలో టెలికాలర్‌గా విధుల్లోకి చేరింది. అదే సంస్థలో తన స్నేహితుడు తరుణ్‌ కూడా చేరాడు. దీంతో ఇద్దరూ ఒకే చోట ఉండాలని నిశ్చయించుకున్నారు. అన్నా, చెల్లెళ్లమని చెప్పి గుణదల ప్రాంతంలో ఓ గదిని అద్దెకు తీసుకుని ఈ నెల 6న చేరారు. మిస్డ్‌కాల్‌ వివాదం దాదాపు 20 రోజులుగా తరుణ్, మున్నీ ఒక ఇంట్లో ఉంటున్నారు. ఈ క్రమంలోనే ఈ నెల 23న మధ్యాహ్నం రెండు గంటల సమయంలో మున్నీ ఫోన్‌కు ఆమె పాత స్నేహితుడు మిస్డ్‌ కాల్‌ ఇచ్చాడు. దీంతో మున్నీ ఫోన్‌ను పరిశీలించిన తరుణ్‌.. అతడితో ఎందుకు మాట్లాడుతున్నావని ప్రశ్నించాడు. ఆ నెంబర్‌ బ్లాక్‌ లిస్ట్‌లో ఉందని, తాను మాట్లాడడం లేదని తెలిపింది. ఈ విషయమై ఇద్దరి మధ్య వాగ్వాదం జరిగింది. దీంతో కోపంతో నిన్ను పెళ్లిచేసుకునేది లేదంటూ తరుణ్‌ ఆమెతో గడవపడి బయటకు వచ్చేశాడు. దీంతో తీవ్ర మనస్తాపానికి గురైన మున్నీ.. గది లోపలికి వెళ్లి తలుపులు బిగించుకుంది. అదే సమయంలో ఇంటి యజమాని వచ్చి, లోపల తమ పలుగు ఉందని, ఓ సారి ఇవ్వాలని బయట కూర్చున్న తరుణ్‌ని అడిగాడు. అతను తలుపు కొట్టగా, మున్నీ ఎంత సేపటికీ తీయలేదు. దీంతో అనుమానం వచ్చి కిటికీలో నుంచి చూడగా ఉరివేసుకుని ఫ్యాన్‌కు వేలాడుతోంది. వెంటనే తలుపులు పగలగొట్టి ఆమెను హుటాహుటిన ఆస్పత్రికి తీసుకెళ్లారు. అక్కడి నుంచి తరుణ్‌ మాచవరం పోలీస్‌ స్టేషన్‌కు వెళ్లి జరిగిన ఘటనను పోలీసులకు వివరించి లొంగిపోయాడు. అయితే, మూడు రోజులుగా మృత్యువుతో పోరాడిన మున్నీ సోమవారం మధ్యాహ్నం మృతిచెందింది. మృతురాలి తండ్రి ఫిర్యాదు మేరకు మాచవరం పోలీసులు అనుమానాస్పద మృతి కింద కేసు నమోదు చేసి దర్యాప్తు చేస్తున్నారు. శవపరీక్ష నివేదిక ఆధారంగా తరుణ్‌పై కేసు నమోదు చేయనున్నట్లు సీఐ ప్రభాకర్‌ తెలిపారు. మాయ మాటలతో వంచించాడంటూ..కంప్యూటర్‌ కొనిస్తానని, మాయమాటలు చెప్పి ఇక్కడకు తమ అమ్మాయిని తరుణ్‌ తీసుకొచ్చాడని మృతురాలి బంధువులు ఆరోపించారు. మరో రెండు రోజుల్లో పరీక్షలు పూర్తి చేసుకుని ఇంటికి వస్తానని శుక్రవారం మధ్యాహ్నం రెండు గంటలకు తల్లికి ఫోన్‌లో చెప్పిందన్నారు. తమకు, మున్నీ, తరుణ్ ప్రేమించుకుంటున్న సంగతి తెలియదని వెల్లడించారు. మధ్యాహ్నం 2.30 గంటలకు తరుణ్‌ అనే వ్యక్తి ఫోన్‌ చేసి, మీ చెల్లి ఉరివేసుకుని చనిపోయిందని చెప్పాడని మున్నీ అన్నయ్య సునీల్‌ తెలిపారు. వెంటనే కొత్త ఆస్పత్రికి వచ్చి సిబ్బందిని అడిగితే చనిపోలేదని, కొన ఊపిరితో ఉందని చెప్పారన్నారు. మున్నీ మెడ ఎముకలు విరిగిపోయాయని, కాలి మడమ పైభాగంలో బొబ్బలున్నాయని, తరుణ్‌ ఆమెను కొట్టి చంపాడని బంధువులు ఆరోపించారు.