ఏపీలో మహిళలకు రక్షణ కల్పించే ఉద్దేశంతో జగన్ ప్రభుత్వం ప్రవేశపెట్టిన ‘దిశ’ యాప్ ఓ మహిళను కాపాడింది. చీరాలలో ఆత్మహత్య చేసుకునేందుకు ఇద్దరు పిల్లలతో సహా వెళ్లిన మహిళను టెక్నాలజీ సాయంతో గుర్తించి పోలీసులు రక్షించారు. మూడు రోజుల క్రితం జరిగిన ఈ ఘటన ఆలస్యంగా వెలుగులోకొచ్చింది. ఈ నెల 27 మధ్యాహ్నం సమయంలో ఈపురుపాలెం పోలీస్ స్టేషన్‌కు ఓ ఫోన్ వచ్చింది. ఆ ఫోన్‌ను స్టేషన్ ఎస్సై సుబ్బారావు లిఫ్ట్ చేశారు. అవతలి నుంచి ‘సర్.. మా అమ్మాయి అనురూప. ఆత్మహత్య చేసుకోవడానికి అక్కడకు వచ్చింది. తన ఇద్దరు పిల్లలను కూడా వెంటబెట్టుకొచ్చింది. దయచేసి ప్రాణాలు కాపాడండి’ అనేది ఆ ఫోన్ సారాంశం. విషయం తెలుసుకున్న సుబ్బారావు.. వెంటనే సిబ్బందిని అలర్ట్ చేశారు. బాధితురాలి ఫోన్ నెంబర్ల ఆధారంగా ఆమె లొకేషన్ ట్రేస్ చేశారు. ఓడరేవు ప్రాంతంలో ఆమె ఉన్నట్లు తెలుసుకుని.. వెతికేందుకు సిబ్బందిని పంపారు. ఓడరేవు ప్రాంతంలో అనురూప ఇద్దరు పిల్లలతో కనిపించింది. ఇక్కడకు ఎందుకు వచ్చారని ఆరా తీస్తే.. అత్త, భర్తల వేధింపులు భరించలేక ఆత్మహత్య చేసుకోవాలనుకుంటున్నట్లు చెప్పిందా యువతి. వెంటనే ఆమెను స్టేషన్‌కు తీసుకువచ్చారు. ఎస్సై సుబ్బారావు ఆమెకు కౌన్సెలింగ్ ఇచ్చి పంపించారు. ప్రాణం చాలా విలువైనదని చిన్ని చిన్న సమస్యలకే విలువైన ప్రాణాన్ని తీసుకోవడం ఏ విధంగానూ పరిష్కారం కాదని, ఎవరూ ప్రాణాలు తీసుకోవద్దని ఎస్సై పేర్కొన్నారు. కేసును ఆయన పరిష్కరించిన తీరుకు అంతా అభినందిస్తున్నారు.
0 Comments