భారత్‌పై సుదీర్ఘ విరామం తర్వాత శ్రీలంక టీమ్ మళ్లీ సిరీస్ గెలిచింది. కొలంబో వేదికగా గురువారం రాత్రి జరిగిన మూడో టీ20 మ్యాచ్‌లో తొలుత బ్యాటింగ్ చేసిన భారత్ జట్టుని 81/8కే పరిమితం చేసిన లంకేయులు.. లక్ష్యాన్ని 14.3 ఓవర్లలోనే 82/3తో ఛేదించేశారు. దాంతో.. మూడు టీ20ల సిరీస్‌ని 2-1తో శ్రీలంక చేజిక్కించుకుంది. 2013 తర్వాత భారత్‌పై ఓ ద్వైపాక్షిక సిరీస్‌ని శ్రీలంక గెలవడం ఇదే తొలిసారి. 2013, ఆగస్టు నుంచి భారత్, శ్రీలంక మధ్య అన్ని ఫార్మాట్లలో కలిపి 21 ద్వైపాక్షిక సిరీస్‌లు జరగగా.. అన్నింటిలోనూ టీమిండియానే విజయం సాధించింది. ఇందులో 8 టీ20 ద్వైపాక్షిక సిరీస్‌లు కూడా ఉన్నాయి. మొత్తంగా సుదీర్ఘ విరామం తర్వాత టీ20 సిరీస్‌ని భారత్‌పై శ్రీలంక గెలిచింది. మూడో టీ20లో 81 పరుగులే చేయగా.. టీ20ల్లో భారత్ జట్టు చేసిన మూడో అత్యల్ప స్కోరు ఇది. 2008లో ఆస్ట్రేలియాతో మెల్‌బోర్న్ వేదికగా జరిగిన టీ20 మ్యాచ్‌లో భారత్ జట్టు 74 పరుగులకే ఆలౌటైంది. ఆ తర్వాత 2016లో న్యూజిలాండ్‌తో నాగ్‌పూర్ వేదికగా జరిగిన టీ20 మ్యాచ్‌లో 79 పరుగులకి భారత్ జట్టు కుప్పకూలింది. టీ20ల్లో 20 ఓవర్లు బ్యాటింగ్ చేసినా.. తక్కువ స్కోరు నమోదు చేసిన రెండో టీమ్‌గా టీమిండియా చెత్త రికార్డ్‌లో నిలిచింది. జింబాబ్వేతో 2010లో జరిగిన మ్యాచ్‌లో 20 ఓవర్లు బ్యాటింగ్ చేసిన వెస్టిండీస్ 79/7తో నిలిచింది. ఆ తర్వాత భారత్ జట్టు 81/8తో రెండో స్థానంలో నిలిచింది. ఇక మూడో స్థానంలో బంగ్లాదేశ్ 2011లో పాకిస్థాన్‌పై 85/9కే పరిమితమైంది. కృనాల్ పాండ్యాకి మంగళవారం కరోనా పాజిటివ్‌గా తేలడంతో.. అతనితో క్లోజ్ కాంటాక్ట్‌లో ఉన్న ఆటగాళ్లు పృథ్వీ షా, ఇషాన్ కిషన్, హార్దిక్ పాండ్య, సూర్యకుమార్ యాదవ్, తదితరులు ఐసోలేషన్‌కి పరిమితమయ్యారు. దాంతో ఈ మ్యాచ్‌కి కూడా రుతురాజ్ గైక్వాడ్, శిఖర్ ధావన్, దేవదత్ పడిక్కల్, సంజు శాంసన్, నితీశ్ రాణా రూపంలో కేవలం ఐదుగురు ప్రొఫెషనల్ బ్యాట్స్‌మెన్‌లతో భారత్ ఆడింది.
0 Comments