న్యూజిలాండ్ ఫాస్ట్ బౌలర్ టిమ్ సౌథీ గొప్ప మనసు చాటుకున్నాడు. భారత్‌తో సౌథాంప్టన్ వేదికగా ఇటీవల ముగిసిన ఐసీసీ వరల్డ్ టెస్టు ఛాంపియన్‌షిప్ ఫైనల్లో తాను ధరించిన జెర్సీని ఓ మంచి పని కోసం వేలానికి ఉంచాడు. రిజర్వ్ డేతో కలుపుకుని ఆరు రోజులు జరిగిన ఈ ఫైనల్ మ్యాచ్‌లో 8 వికెట్ల తేడాతో విజయాన్ని అందుకున్న న్యూజిలాండ్.. ఫస్ట్ ఐసీసీ వరల్డ్ టెస్టు ఛాంపియన్‌షిప్ విజేతగా నిలిచింది. క్యాన్సర్‌తో ఎనిమిదేళ్ల హోలీ బీటీ అనే చిన్నారి బాధపడుతుండటంతో చలించిపోయిన టిమ్ సౌథీ.. ఆమె వైద్యం కోసం విరాళాలు సేకరిస్తున్నాడు. ఈ క్రమంలో తాను ఫైనల్లో ధరించిన జెర్సీని వేలానికి టిమ్ సౌథీ ఉంచాడు. ఆ జెర్సీపై ఫైనల్లో ఆడిన న్యూజిలాండ్ ఆటగాళ్లు అందరూ సంతకం చేశారు. వేలంలో వచ్చిన మొత్తాన్ని హోలీ బీటీ కుటుంబానికి అందజేస్తానని టిమ్ సౌథీ స్పష్టం చేశాడు. ఆ ఫైనల్ తొలి ఇన్నింగ్స్‌లో 64 పరుగులిచ్చి ఒక వికెట్ మాత్రమే పడగొట్టిన టిమ్ సౌథీ.. సెకండ్ ఇన్నింగ్స్‌లో 48 పరుగులిచ్చి ఏకంగా 4 వికెట్లు పడగొట్టాడు. మరీ ముఖ్యంగా.. ఓపెనర్లు శుభమన్ గిల్, రోహిత్ శర్మలను ఆరంభంలోనే ఔట్ చేసిన టిమ్ సౌథీ.. చివర్లో షమీ, బుమ్రాలను కట్టడి చేయడం ద్వారా భారత్ ఆధిక్యం పెరగకుండా చూశాడు. అలానే మొదటి ఇన్నింగ్స్‌లో బ్యాట్‌తో అతను చేసిన 30 పరుగులు.. చివరి రోజు కీలకంగా మారాయి.
0 Comments