భారత మహిళల వన్డే జట్టు కెప్టెన్ మిథాలీ రాజ్ మళ్లీ ఐసీసీ వన్డే ర్యాంకింగ్స్‌లో టాప్-5లోకి దూసుకొచ్చింది. గత ఆదివారం ఇంగ్లాండ్ మహిళల జట్టుతో జరిగిన తొలి వన్డేలో 108 బంతులు ఎదుర్కొన్న 7 ఫోర్ల సాయంతో 72 పరుగులు చేసింది. ఈ మ్యాచ్‌లో భారత్ జట్టు ఓడిపోయినప్పటికీ.. ఇంటర్నేషనల్‌ కెరీర్‌లో 22 ఏళ్లు పూర్తి చేసుకున్న తొలి మహిళా క్రికెటర్‌గా మిథాలీ రాజ్ అరుదైన ఘనత సాధించింది. భారత్, ఇంగ్లాండ్ మహిళల జట్ల మధ్య బుధవారం రెండో వన్డే మ్యాచ్ జరగనుండగా.. తాజాగా ప్రకటించిన ఐసీసీ ర్యాంకింగ్స్‌లో మూడు స్థానాలు పైకి ఎగబాకిన మిథాలీ రాజ్ ఐదో స్థానానికి ఎగబాకింది. అలానే ఓపెనర్ మంధనా తొలి వన్డేలో 25 బంతులు ఎదుర్కొని 10 పరుగులకే ఔటైవడంతో రెండు స్థానాలు దిగజారి 9వ స్థానానికి పడిపోయింది. మొత్తంగా టాప్-10లో ఈ ఇద్దరు బ్యాటర్లు మాత్రమే భారత్ నుంచి చోటు దక్కించుకున్నారు. బౌలింగ్ ర్యాంకింగ్స్‌లో ఫాస్ట్ బౌలర్ జులన్ గోస్వామి ఐదో స్థానంలో నిలిచింది. తొలి వన్డేలో 6 ఓవర్లు వేసిన గోస్వామి 25 పరుగులిచ్చి ఒక వికెట్ పడగొట్టింది. ఇక తొలి వన్డేలో ఆడనప్పటికీ.. స్పిన్నర్ పూనమ్ యాదవ్ రెండు స్థానాలు పైకి ఎగబాకి 9వ స్థానంలో నిలవడం విశేషం.
0 Comments