శ్రీవారి సేవలో బోయపాటి శ్రీను.. ‘అఖండ’ రిలీజ్‌పై క్లారిటీ ఇచ్చిన డైరెక్టర్

శ్రీవారిని బుధవారం పలువురు ప్రముఖులు దర్శించుకున్నారు. ఉదయం వీఐపీ దర్శన సమయంలో దర్శకుడు బోయపాటి శ్రీనివాస్, ప్రభుత్వ విప్ ముత్యాల నాయుడు స్వామివారిని దర్శించుకొని మొక్కులు చెల్లించుకున్నారు. అనంతరం ఆలయ అర్చకులు వారిని ఆశీర్వదించి తీర్ధప్రసాదాలు అందచేశారు. ఈ సందర్భంగా మీడియాతో మాట్లాడుతూ... నందమూరి బాలకృష్ణతో తెరకెక్కిస్తున్న ‘అఖండ’ క్లైమాక్స్ షూటింగ్‌ లొకేషన్ల కోసం వెతుకుతున్నట్లు తెలిపారు. హైదరాబాద్‌లో భారీవర్షాలు కురుస్తున్నందున కడపలో లొకేషన్స్ వెతుకుతున్నట్లు వెల్లడించారు. కరోనా థర్డ్ వేవ్ వ్యాప్తి గమనించి ‘అఖండ’ సినిమా విడుదల తేదీని నిర్ణయిస్తామని ఈ సందర్భంగా ఆయన తెలిపారు. ప్రభుత్వ విప్ ముత్యాల నాయుడు మాట్లాడుతూ... రాష్ట్రం సుభిక్షంగా ఉండాలని, ముఖ్యమంత్రి జగన్‌కి ఆయురారోగ్యాలు ఉండాలని శ్రీవారిని కోరుకున్నట్లు తెలిపారు. త్వరలోనే కరోనా వైరస్ నుండి లోకానికి విముక్తి రావాలని స్వామివారిని మొక్కుకున్నట్లు పేర్కొన్నారు.