సర్కారు కొలువులపై సంచలన ప్రకటన.. నిరుద్యోగుల్లో జోష్ నింపేలా, వచ్చే ఏడాదిలో..!

ముఖ్యమంత్రి వైఎస్ జగన్మోహన్ రెడ్డి ఇటీవల ప్రకటించిన జాబ్ క్యాలెండర్‌పై పెద్ద ఎత్తున విమర్శలు వ్యక్తమవుతున్నాయి. జాబ్ క్యాలెండర్‌పై ప్రతిపక్ష పార్టీలు ఆందోళనలు చేపట్టాయి. ఈ తరుణంలో ఈ వ్యవహారంపై రాష్ట్ర ప్రభుత్వ సలహాదారు, వైఎస్సార్ కాంగ్రెస్ పార్టీ ముఖ్య నేత రియాక్ట్ అయ్యారు. ఉద్యోగ ఖాళీలపై కీలక ప్రకటన చేశారు. ఆంధ్రప్రదేశ్‌లో నూతన విద్యా విధానం అమల్లోకి తీసుకొచ్చేందుకు రాష్ట్ర ప్రభుత్వం చర్యలు తీసుకుంటోందని, ఈ విధానం ప్రారంభమైన తర్వాత ఉపాధ్యాయ ఖాళీలపై స్పష్టత వస్తుందని సజ్జల రామకృష్ణారెడ్డి అన్నారు. ఆ తర్వాతే టీచర్ల భర్తీ ప్రక్రియ చేపడతామన్నారు. ఏపీ ప్రభుత్వం ఒక్క పాఠశాల కూడా మూతపడకుండా నూతన విద్యా విధానాన్ని అమలు చేస్తోందని చెప్పారు. ప్రస్తుతం 8 వేల ఏకోపాధ్యాయ పాఠశాలలు ఉండాల్సిన పరిస్థితి ఉందని, నూతన విద్యా విధానంలో ఈ సమస్య పరిష్కారమవుతుందని చెప్పారు. విద్యారంగంలో జగన్‌ ప్రభుత్వం ప్రాధాన్యత క్రమంలో ముందుకు వెళ్తోందని సజ్జల తెలిపారు. గత రెండేళ్లలో దేశంలో ఎక్కడా లేని విధంగా 1,83,480 రెగ్యులర్ ఉద్యోగాలను భర్తీ చేసినట్లు ఆయన వివరించారు. జాబ్ క్యాలెండర్‌లో పోస్టుల సంఖ్య తగ్గిందని కొందరు ఆందోళన వ్యక్తం చేస్తున్నారనీ, ఇకపై ప్రతి సంవత్సరం జాబ్ కేలండర్ విడుదల చేస్తామని హామీ ఇచ్చారు. వచ్చే ఏడాది పోస్టుల సంఖ్య పెరగవచ్చన్నారు. అయితే, వైసీపీ ప్రభుత్వంపై కావాలని తప్పుడు ప్రచారాలు చేస్తున్నారని సజ్జల రామకృష్ణారెడ్డి ఆగ్రహం వ్యక్తం చేశారు. టీచర్‌ పోస్టుల భర్తీపై తప్పుడు ప్రచారం చేస్తున్నారన్నారు.