విజయవాడ: యజమానికి గుమస్తా షాక్.. ఏకంగా 10 కేజీల బంగారం, ఏమైందంటే

విజయవాడలో యజమానికి గుమస్తా షాకిచ్చాడు. బంగారు ఆభరణాలతో సహా పరారయ్యాడు. గవర్నర్‌పేట జైహింద్‌ కాంప్లెక్స్‌ మొదటి అంతస్తులో మహవీర్‌ జైన్‌ అనే వ్యక్తి రాహుల్‌ జ్యువెలరీ పేరుతో షాపు నిర్వహిస్తున్నాడు. రవితేజ, హర్ష అనే ఇద్దరు గుమస్తాలు ఆ షాపులో పనిచేస్తున్నారు. ఐదో అంతస్తులో యజమాని మహవీర్‌ జైన్‌ కుటుంబంతో కలిసి నివసిస్తున్నాడు. కరోనా కారణంగా వ్యాపారం తక్కువగా జరుగుతుండటంతో మహవీర్‌ జైన్‌ ఆభరణాలను ఇంట్లోనే ఉంచి కొనుగోలు దారులు వచ్చినప్పుడు గుమస్తాలను పంపి వాటిని షాపులోకి తెప్పిస్తున్నాడు.. తర్వాత తిరిగి ఇంటికి పంపుతున్నాడు. మంగళవారం ఉదయం ఆభరణాలు తీసుకొచ్చేందుకు ఇద్దరు గుమస్తాలను యజమాని తన ఇంటికి పంపాడు. అతడి భార్య, కుమారుడు రెండు బ్యాగుల్లో ఉన్న బంగారు ఆభరణాలను వారిద్దరికీ ఇచ్చి పంపారు. ఉదయం 11 గంటల తర్వాత ఆ ఆభరణాలను తిరిగి ఇద్దరు గుమస్తాలు యజమాని ఇంటికెళ్లి ఇచ్చి వచ్చారు. మహావీర్‌ సోదరుడు ఇటీవల కరోనాతో ఓ ఆస్పత్రిలో చికిత్స పొందుతున్నాడు. అతడ్ని చూసి వచ్చేందుకు మహావీర్‌ 11.30 గంటల సమయంలో షాపు నుంచి ఆస్పత్రికి వెళ్లాడు. యజమాని బయటకు వెళ్లాడని తెలియడంతో గుమస్తా హర్ష 12.30 గంటల సమయంలో యజమాని ఇంటికి వెళ్లి ఆభరణాలు అడిగాడు. ఎప్పటిలాగే కొనుగోలుదారులకు చూపడానికే అనుకుని మహవీర్‌ భార్య, అతని కుమారుడు తిరిగి రెండు బ్యాగుల్లో ఉన్న ఆభరణాలను హర్ష చేతికి అందజేశారు. రెండు బ్యాగులతో కిందకు వచ్చిన హర్ష షాపుకు వెళ్లకుండా బయటకు వెళ్లిపోయాడు. మహవీర్‌ సాయంత్రం ఇంటికి వచ్చాడు.. బుధవారం షాపు తీసి ఆభరణాల కోసం ఆరా తీయడంతో దిమ్మ తిరిగింది. 10 కేజీల బంగారం హర్ష తీసుకెళ్లినట్లు బయట పడింది. బాధితుడు వెంటనే పోలీసులకు ఫిర్యాదు చేయడంతో పోలీసులు కేసు నమోదు చేసి దర్యాప్తు ప్రారంభించారు. విజయవాడకు చెందిన హర్ష బంగారం షాపులో ఏడాదిగా పనిచేస్తున్నాడు. బంగారం ఎత్తుకెళ్లే ముందు షాపులో తనకు సంబంధించిన ఆధారాలు దుకాణంలో లేకుండా జాగ్రత్త పడ్డాడు. అలాగే షాపుకు సంబంధించి రూ.4.5 లక్షల విలువైన చెక్కును పోరంకి సమీపంలోని బ్యాంకులో హర్ష డబ్బుగా మార్చుకున్నట్లు గుర్తించారు. ముందుగానే ప్లాన్ చేసుకుని బంగారం చోరీ చేసి ఉంటాడని పోలీసులు అనుమానిస్తున్నారు. కృష్ణలంకలో ఉంటున్న ఇంటిని పది రోజుల క్రితం ఖాళీ చేశాడు. గుంటూరు జిల్లా తాడేపల్లికి వెళుతున్నట్లు అందరికీ చెప్పాడు. విజయవాడలోనే ఉంటూ.. ఆ అడ్రస్ తెలియకుండా జాగ్రత్తపడ్డాడు. హర్షను పట్టుకునేందుకు పది స్పెషల్ టీమ్‌లను ఏర్పాటు చేశారు. షాపుతో పాటు పరిసర ప్రాంతాల్లోని సీసీ కెమెరాల్లోని దృశ్యాలను పరిశీలిస్తున్నారు. అతడి బంధువులు, స్నేహితులను వివరాలు ఆరా తీస్తున్నారు.