ఫిబ్రవరి వరకు జాగ్రత్తగా, ఎందుకంటే.. సీఎం జగన్ కీలక వ్యాఖ్యలు

ఏపీ ముఖ్యమంత్రి రాష్ట్రంలో కరోనా పరిస్థితులపై సమీక్ష నిర్వహించారు. వ్యాక్సినేషన్, కేసుల సంఖ్య, కట్టడిపై ఆరా తీశారు. 18 ఏళ్లు దాటిన వారందరికీ వ్యాక్సినేషన్‌ పూర్తి కావాలంటే వచ్చే ఏడాది జనవరి చివరికి సాధ్యమవుతుందని అభిప్రాయపడ్డారు సీఎం. కరోనాకు టీకాలు వేయడమే పరిష్కారమని.. వచ్చే ఫిబ్రవరి వరకూ అందరం జాగ్రత్తగా ఉండాల్సిందే అని వ్యాఖ్యానించారు. దేశంలో 45 ఏళ్లు దాటిన వారందరికీ వ్యాక్సిన్‌ ఇవ్వాలంటే ఇంకా నాలుగైదు నెలలు పడుతుంది అన్నారు. దేశంలో 18 ఏళ్లు దాటినవారు 60 కోట్ల మంది ఉన్నారు. వారికి 120 కోట్ల డోసులు కావాలి. సెప్టెంబరు తర్వాతే వారికి వ్యాక్సినేషన్‌ సాధ్యమన్నారు. అప్పటి నుంచి జనవరి చివరి వరకు వారి వ్యాక్సినేషన్‌కే సమయం సరిపోతుందన్నారు. ఇలా చూస్తే దేశంలో వ్యాక్సినేషన్‌ ప్రక్రియ మొత్తం పూర్తికావాలంటే జనవరి నెలాఖరు అవుతుందన్నారు. వచ్చే ఏడాది ఫిబ్రవరి వరకూ జాగ్రత్తగా ఉండాలి.. పారిశుద్ధ్య కార్యక్రమాలు సక్రమంగా నిర్వహించాలి అన్నారు. పరిసరాలతో పాటు వ్యక్తిగత పరిశుభ్రత విషయంలోను చాలా జాగ్రత్తగా ఉండాలని.. మాస్కులు, భౌతికదూరం వంటివి తప్పనిసరి అన్నారు. రాష్ట్రంలో కరోనా పరిస్థితులపై ముఖ్యమంత్రి వైఎస్‌ జగన్‌మోహన్‌రెడ్డి సమీక్ష నిర్వహించారు. కొవిడ్ ఆస్పత్రుల్లో బెడ్ల సంఖ్య పెంచాలని సీఎం జగన్ అధికారులను ఆదేశించారు. ప్రతి జిల్లాలోనూ కోవిడ్ కేర్ సెంటర్లలో 3 వేల బెడ్లు కేటాయించాలని.. అవసరమైన చోట అదనపు సిబ్బందిని తక్షణం నియమించాలని సూచించారు. కొత్తగా ఆక్సిజన్ ప్లాంట్లను ఏర్పాటు చేయాలని అధికారులను ఆదేశించారు.