అధికార పార్టీ ఎంపీని నాకే దిక్కులేదు: రాజ్యసభ సభ్యుడు బోస్‌ ఆవేదన

మాజీ ఉప ముఖ్యమంత్రి, వైసీపీ రాజ్యసభ సభ్యుడు పిల్లి సుభాష్‌ చంద్రబోస్‌ పోలీసుల అసహనం వ్యక్తం చేశారు. రాజ్యసభ సభ్యుడినైన తనకే పోలీసులు న్యాయం చేయకపోతే సామాన్యులకేం చేస్తారని ఆవేదనతో ప్రశ్నించారు. రామచంద్రపురంలోని న్యాయస్థానాల సముదాయం ఆవరణలో సోమవారం ఆయన మీడియాతో మాట్లాడారు. Also Read: మే 6వ తేదీన తాను మాట్లాడని మాటలను మాట్లాడినట్లు చూపించిన ఓ టీవీ ఛానల్‌, వాటి ఆధారంగా ఆరోపణలు చేసిన టీడీపీ జాతీయ ప్రధాన కార్యదర్శి నారా లోకేష్, టీడీపీ ఏపీ రాష్ట్ర అధ్యక్షుడు కింజరాపు అచ్చెన్నాయుడు, యూట్యూబ్‌లో అప్‌లోడ్‌ చేసిన వారిపై చర్యలు తీసుకోవాలని మే 13న తాను ద్రాక్షారామ పోలీస్‌ స్టేషన్‌లో ఫిర్యాదు చేశానని, అనంతరం డీఎస్పీకి, డీజీపీకి సైతం ఫిర్యాదు చేసినట్లు బోస్ తెలిపారు. దీనికి సంబంధించి అన్ని ఆధారాలను పెన్‌డ్రైవ్‌లో పెట్టి పోలీసులకు అందించానన్నారు. అయితే ఆరు వారాలు గడిచినా తాను ఇచ్చిన ఫిర్యాదుపై పోలీసులు ఎఫ్‌ఐఆర్‌ నమోదు చేయకపోవడంపై ఆయన ఆవేదన వ్యక్తం చేశారు. తన ఫిర్యాదుపై ఎందుకు ఎఫ్ఐఆర్ నమోదు చేయలేదని ప్రశ్నిస్తే లీగల్ ఒపీనియన్‌కు పంపామని పోలీసులు చెబుతున్నారని, దానికోసం ఏకంగా ఆరువారాల సమయం కావాలా? అని నిలదీశారు. ఒకవేళ కేసు నమోదు చేయకపోతే కారణం తెలుపుతూ తనకు జవాబు ఇవ్వాల్సిన బాధ్యత పోలీసులపై ఉందన్నారు. పోలీసుల తీరుపై రామచంద్రపురం అదనపు జుడిషియల్‌ ఫస్టు క్లాస్‌ మేజిస్ట్రేట్‌కు ఆయన సోమవారం ఫిర్యాదు చేశారు. తన కేసుపై న్యాయం కోరుతూ మెజిస్ట్రేట్‌కు ఫిర్యాదు చేసినట్లు బోస్ తెలిపారు. రాజ్యసభ సభ్యుడినైన తనతోనే పోలీసులు ఇలా ప్రవర్తిస్తే ఇక సామాన్యులకేం న్యాయం జరుగుతుందని ఆయన అసహనం వ్యక్తం చేశారు.