ఇండియా మ్యాప్‌ను ట్విట్టర్ మరోసారి తప్పుగా చూపించడం పట్ల ఆగ్రహజ్వాలలు ఎగిసిపడుతున్నాయి. ట్విట్టర్ చర్యలపై తీవ్ర దుమారం రేగడంతో ఆ మ్యాప్‌ను తన వెబ్సైట్ నుంచి తొలగించింది. తాజాగా, ట్విట్టర్ ఇండియా చీఫ్ మనీశ్ మహేశ్వరిపై యూపీలో ఎఫ్ఐఆర్ నమోదయ్యింది. ఈ నెలలో ట్విట్టర్ ఎండీకి వ్యతిరేకంగా యూపీలో నమోదయిన రెండో కేసు ఇది. భారత మ్యాపును తప్పుగా చూపించిన ట్విట్టర్‌పై బజరంగ్ దళ్ నేత ప్రవీణ్ భాటి ఇచ్చిన ఫిర్యాదు మేరకు యూపీ పోలీసులు కేసు నమోదు చేశారు. ‘ట్విట్టర్ ఉద్దేశపూర్వకంగా రాజద్రోహానికి పాల్పడింది.. చర్యలు తీసుకోవాలని’ అని ప్రవీణ్ భాటి తన ఫిర్యాదులో పేర్కొన్నాడు. ఐపీసీ సెక్షన్ 505 (2), ఐటీ చట్టం సెక్షన్ 74 కింద కేసు నమోదయ్యింది. మనీశ్ మహేశ్వరితోపాటు ట్విట్టర్ ఇండియా న్యూస్ విభాగం హెడ్ అమృత త్రిపాఠీ పేరును కూడా చేర్చారు. గతవారం ఘజియాబాద్‌లో ఓ ముస్లిం వ్యక్తిపై కొందరు దాడిచేసి ‘జై శ్రీరామ్’ అని పలకాలని బలవంతం చేసినట్టు పెట్టిన పోస్ట్‌పై యూపీ పోలీసులు కేసు నమోదుచేశారు. జూన్ న 'జై శ్రీరామ్' అని పలకాలని ఓ వ్యక్తిపై దాడి చేసిన వీడియోను కాంగ్రెస్ నాయకులు, పలువురు పాత్రికేయులు, ది వైర్ అనే వెబ్సైట్ మతపరమైన ఘర్షణలు సృష్టించాలనే ఉద్దేశంతో షేర్ చేశారని నోటీసుల్లో తెలిపారు. సమాజంలో విద్వేషాలను రెచ్చగొట్టేందుకు కొంతమంది ట్విట్టర్ను ఉపయోగించుకున్నారన్న పోలీసులు... ట్విట్టర్ సంస్థగానీ, భారత్‌లోని దాని విభాగంగానీ దీనిపై ఎలాంటి చర్యలు తీసుకోలేదని పేర్కొన్నారు. దీంతో ఈ విద్వేషపూరితమైన సందేశం వైరల్‌గా మారేందుకు ఆస్కారం ఏర్పడిందని స్పష్టం చేశారు. ఈ కేసులో జర్నలిస్ట్‌లు రాణా ఆయుబ్, సబా నఖ్వీ, కాంగ్రెస్ నేతలపై ఘాజియాబాద్ పోలీసులు కేసు పెట్టారు. ఈ కేసులో ట్విటర్‌ ఇండియా ఎండీ మనీశ్ మహేశ్వరికి కర్ణాటక హైకోర్టులో ఊరట లభించింది. ఆయనపై ఎలాంటి చర్యలూ తీసుకోవద్దని ఘజియాబాద్‌ పోలీసులను ఆదేశించింది. ఈ మేరకు గత గురువారం మధ్యంతర ఉత్తర్వులు ఇచ్చింది. తదుపరి విచారణను జూన్ 29కి వాయిదా వేసింది. అప్పటి వరకు మనీశ్‌ను అరెస్ట్‌ చేయకూడదని స్పష్టం చేసింది.
0 Comments