శ్రీలంక క్రికెటర్లు సస్పెండ్.. సిగరెట్ కాల్చేందుకు వెళ్లి దొరికారు

ఇంగ్లాండ్ గడ్డపై రూల్స్ బ్రేక్ చేసి రోడ్డుపై సిగరెట్ కాల్చిన శ్రీలంక క్రికెటర్లపై వేటు పడింది. ఇంగ్లాండ్‌తో మూడు టీ20లు, మూడు వన్డేల సిరీస్‌ ఆడేందుకు శ్రీలంక జట్టు అక్కడికి వెళ్లగా.. ఇప్పటికే మూడు టీ20ల సిరీస్ ముగిసింది. ఇక వన్డే సిరీస్ మంగళవారం నుంచి ప్రారంభంకానుంది. మూడు టీ20ల సిరీస్‌ని పేలవంగా 0-3తో శ్రీలంక చేజార్చుకోగా.. ఆఖరి టీ20 మ్యాచ్ ముగిసిన తర్వాత ఆ జట్టు ఆటగాళ్లు కుశాల్ మెండిస్, నిరోషాన్ డిక్వెల్లా, దనుష్ గుణతిలక టీమ్ బస చేసిన హోటల్‌ని వీడటం ద్వారా బయో- సెక్యూర్ బబుల్‌ని బ్రేక్ చేశారు. అక్కడే డర్హామ్‌లోని ఓ స్ట్రీట్‌లోకి వెళ్లిన మెండిస్, డిక్వెల్లా సిగరెట్ తాగుతూ శ్రీలంక అభిమాని కంటపడ్డారు. దాంతో.. సదరు అభిమాని తన మొబైల్‌తో వీడియో తీసి సోషల్ మీడియాలో పోస్ట్ చేశాడు. ముగ్గురూ నిబంధనల్ని అతిక్రమించినట్లు తేలడంతో.. వారిపై శ్రీలంక బోర్డు చర్యలు తీసుకుంది. ‘‘రూల్స్‌ని బ్రేక్ చేసినట్లు విచారణలో తేలడంతో శ్రీలంక క్రికెట్ ఎగ్జిక్యూటివ్ కమిటీ కుశాల్ మెండిస్, దనుష్ గుణతిలక, నిరోషాన్ డిక్వెల్లాను సస్పెండ్ చేసింది. వారిని వెంటనే శ్రీలంకకి వచ్చేయాల్సిందిగా ఆదేశించింది’’ అని శ్రీలంక క్రికెట్ బోర్డు సెక్రటరీ మోహన్ డిసిల్వా ఓ ప్రకటన విడుదల చేశాడు.