కర్నూలు జిల్లాలో గోల్డ్ రికవరీ కోసం వచ్చిన తెలంగాణ పోలీసులకు షాకిచ్చాడో దొంగ. సీన్ రివర్స్ కావడంతో కథ మొదటికి వచ్చింది. ఆత్మకూరు మండలం సిద్ధాపురంకు చెందిన ఓ దొంగను తెలంగాణలోని మహబూబ్‌నగర్‌ జిల్లా పెబ్బేరు పోలీసులు చోరీ కేసులో అరెస్టు చేశారు. అక్కడ దొంగతనం చేసిన బంగారం గురించి ఆరా తీయగా.. విచారణలో ఆత్మకూరులో బంగారం వ్యాపారికి అమ్మినట్లు చెప్పాడు. బుధవారం అతడ్ని తీసుకుని ఆత్మకూరు స్థానిక షరాఫ్‌ మర్చంట్‌ అసోసియేషన్‌ అధ్యక్షుడ్ని పెబ్బేరు పోలీసులు సంప్రదించారు. బంగారం వ్యాపారులు మొత్తం పోలీస్ స్టేషన్‌కు వచ్చారు.. దొంగ చెప్పిన వివరాలు తెలుసుకున్నారు. గోల్డ్‌ను ఇంతియాజ్‌ అనే వ్యాపారికి అమ్మేశానని దొంగ చెప్పగా.. షరాఫ్‌ మర్చంట్‌ అసోసియేషన్‌ అధ్యక్షుడు రషీద్ ఆగ్రహం వ్యక్తం చేశారు. ఆత్మకూరులో అలాంటి బంగారం ఎవరూ కొనుగోలు చేయరని.. ఎవరికి విక్రయించావో సరిగ్గా చెప్పాలని దొంగను గట్టిగా ప్రశ్నించారు. అప్పుడు దొంగ చెప్పిన సమాధానంతో అందరికి దిమ్మ తిరిగింది. పోలీసులే తనను ఒప్పించి ఏదో ఒక షాపు పేరు చెప్పాలని ఒత్తిడి చేశారనడంతో అందరూ అవాక్కయ్యారు. బంగారం ఆత్మకూరులో అమ్మేసినట్లు ఆధారాలు ఉంటే కేసు నమోదు చేయాలని.. కోర్టుకు హాజరవుతామని రషీద్ సూచించటంతో పెబ్బేరు పోలీసులు వెళ్లిపోయారు.
0 Comments