దేశమంతా కరోనా విలయ తాండం చేస్తున్న నేపథ్యంలో వివాహాలకూ ఆటంకం ఏర్పడింంది. ఈ మహమ్మారి కారణంగా చాలామంది పెళ్లిళ్లు, ఇతర శుభకార్యాలు వాయిదా వేసుకుంటుంటే.. అన్ని ఏర్పాట్లు చేసుకున్న వారు మాత్రం కుటుంబసభ్యుల సమక్షంలో తూతూ మంత్రంగా కానిచ్చేస్తున్నారు. ఈ నేపథ్యంలోనే పెళ్లికి సిద్ధమైన సిద్దిపేట చెందిన ఓ జంట ఎవరినీ ఇబ్బంది పెట్టకుండా వినూత్న ఆలోచన చేసింది. పెండ్లి తంతును డిజిటల్‌ ఇన్‌స్టాగ్రామ్‌ ద్వారా వీక్షించాలని కోరడమే గాక, కట్న కానుకలను సైతం డిజిటల్‌ పేమెంట్‌ ద్వారా చెల్లించాలని పేర్కొంటూ వెడ్డింగ్ కార్డు రూపొందించింది. ఈ పెళ్లి పత్రిక ఇప్పుడు నెట్టింట్లో వైరల్‌గా మారింది. సిద్దిపేట జిల్లా నంగునూరు మండలం దర్గపల్లి గ్రామానికి చెందిన జీల నిర్మల – మల్లేశ్‌ యాదవ్‌ దంపతుల కుమారుడు జీల అనిల్ మై విలేష్ షో అనే యూట్యూబ్ ఛానల్ నిర్వహిస్తున్నాడు. ఓ యువతితో అతడికి మే 1 వివాహం జరగనుంది. ప్రస్తుతం కరోనా విజృంభిస్తున్న నేపథ్యంలో స్థానిక రామలింగేశ్వర ఆలయంలో నిరాడంబరంగా వివాహ తంతు కానిచ్చేయాలని పెద్దలు నిర్ణయించారు. అయితే బంధువులను, సన్నిహితులను చిన్నబుచ్చకుండా ఉండేందుకు అనిల్ వినూత్న ఆలోచన చేవాడు. యాసలో లగ్న పత్రిక రాయించి అందరికీ పోస్ట్‌ చేయడంతో పాటు సోషల్‌ మీడియాలో పోస్టు చేశాడు. ఈ పెళ్లి పత్రిక చూసినోళ్లంతా ఆశ్చర్యంతో నోరెళ్లబెడుతున్నారు. పెళ్లితో పాటు బరాత్‌ కూడా ఇస్టాగ్రామ్‌ లైవ్‌లోనే చూడాలని అనిల్ విజ్ఞప్తి చేశాడు. అంతేకాకుండా కట్న కానుకలను ‘గూగుల్‌ పే, ఫోన్‌ పే’ ద్వారా పంపాలని కోరుతూ అందుకు సంబంధించిన ‘క్యూఆర్’ కోడ్‌తో పొందుపరిచాడు. బహుమతులు పోస్ట్‌ ద్వారా పంపాలనుకునే వారి కోసం ఇంటి అడ్రస్‌ కూడా ఇచ్చాడు. బంధువులందరూ ఎవరింట్లో వాళ్లు బరాత్‌ డ్యాన్స్‌ చేసి ఈ వీడియో పంపితే అది కూడా లైవ్‌ పెడతామని పేర్కొన్నాడు. వినూత్నంగా పెండ్లి కార్డు నెట్టింట్లో హల్‌ చేస్తున్నది. పెళ్లి సంగతి పక్కన పెడితే ఈ వెడ్డింగ్ కార్డు ఐడియా మాత్రం అదిరిదంటూ నెటిజన్లు కామెంట్లు పెడుతున్నారు.
0 Comments