నా ఫోనే ఎత్తకపోతే, సామాన్యుల పరిస్థితేంటి.. వైసీపీ ఎమ్మెల్యే సంచలన వ్యాఖ్యలు

కృష్ణా జిల్లా మేకా ప్రతాప్ అప్పారావు సీఐ ఆఫీస్ ముందు ధర్నాకు దిగడం సంచలనంరేపింది. ఓ కేసు విషయంలో పోలీసుల తీరును తప్పుబట్టారు. అధికార పార్టీ ఎమ్మెల్యేనైన తాను ఫోన్‌ చేస్తేనే పోలీసులు తీయడం లేదని.. ఇక సామాన్యులకేం స్పందిస్తారని ప్రశ్నించారు. మంగళవారం రాత్రి నుంచి బుధవారం మధ్యాహ్నం వరకు హనుమాన్‌జంక్షన్‌ సీఐకి ఫోన్‌ చేస్తూనే ఉన్నా స్పందించలేదన్నారు. నిరసన తెలిపేందుకు సీఐ కార్యాలయానికి వచ్చి రెండు గంటల సేపు అక్కడే బైఠాయించారు. ఆగిరిపల్లి మండలం తోటపల్లిలో నరేగా నిధులతో మురుగు కాలువ నిర్మాణం చేపట్టారు. అక్కడ టీడీపీ మద్దతుదారైన సర్పంచి వైఎస్సార్‌సీపీ కార్యకర్తలపై దాడికి పాల్పడ్డారు.. బాధితులు వెంటనే పోలీసులకు ఫిర్యాదు చేయగా స్పందించలేదన్నారు ఎమ్మెల్యే. బుధవారం కూడా ఆ పని చేసేందుకు వెళ్లిన కొందరిపై సర్పంచి దాడికి దిగడంతో సీఐ, నూజివీడు డీఎస్పీకి ఫోన్‌ చేసినా వారు అందుబాటులోకి రాలేదన్నారు. తర్వాత డీఎస్పీ ఫోన్‌ చేసి 45 నిమిషాల్లో క్లారిటీ ఇస్తానని చెప్పారని.. ఆయన కూడా తర్వాత ఎలాంటి సమాచారమూ ఇవ్వలేదన్నారు. కార్యకర్తల తలలు పగిలిన తర్వాత తీరిగ్గా వస్తారా అని ఎమ్మెల్యే ప్రశ్నించారు. మూడు సార్లు ఎమ్మెల్యేగా గెలిచానని.. పోలీసులు ప్రవర్తించాల్సిన తీరు ఇదేనా అంటూ ప్రశ్నించారు. అందుకే తాను సీఐ కార్యాలయం దగ్గర శాంతియుతంగా నిరసన తెలియజేస్తాను అన్నారు. ఈలోగా నూజివీడు డీఎస్పీ, సీఐ వచ్చి ఎమ్మెల్యేకు నచ్చజెప్పే ప్రయత్నం చేశారు. ఆ తర్వాత ఎమ్మెల్యేని లోపలకు తీసుకెళ్లి చర్చించడంతో వివాదం సద్దుమణిగింది.