కడప: ఇంజనీర్ ఇంట్లో ఏసీబీ సోదాలు.. బాబోయ్ ఆస్తుల విలువ తెలిస్తే..

కడపలో అవినీతి అధికారి అక్రమాస్తులు బయటపడ్డాయి. పంచాయతీరాజ్‌ క్వాలిటీ కంట్రోల్‌ డిప్యూటీ ఎగ్జిక్యూటివ్‌ ఇంజనీరుగా సుధాకర్ పని చేస్తున్నారు. కడపలో ఉన్న శ్రీవిజయదుర్గ కాలనీలోని సుధాకర్‌ ఇంటితో పాటు ఆయన కుమార్తె మరో ఇరువురు స్నేహితుల ఇళ్లల్లో ఏకకాలంలో 8 చోట్ల సోదాలు నిర్వహించారు. మైదుకూరు, రాజంపేట, రైల్వేకోడూరు, తిరుపతిలో కూడా ఏసీబీ అధికారులు సోదాలు జరిపారు. సుధాకర్‌ 1987లో కాంప్లెక్స్‌ గ్రౌండ్స్‌లో స్టెనోగా చేరి ప్రస్తుతం డీఈఈగా పనిచేస్తున్నారు. కోర్టు ఆదేశాలతో సోదాలు నిర్వహించినట్లు ఏసీబీ అధికారులు తెలిపారు. సుధాకర్‌తో పాటు ఆయన కుటుంబసభ్యుల పేరుమీద రూ.1.31కోట్ల అక్రమాస్తులు గుర్తించామన్నారు. డీఈని అరెస్టు చేసి కర్నూలు ఏసీబీ కోర్టుకు తరలించారు. సుధాకర్, అతని కుటుంబ సభ్యుల పేరిట కడప విజయదుర్గ కాలనీలో జీ+1 భవనం, కడపలో ఏడు నివాస స్థలాలు, మైదుకూరులో మూడు ఇళ్ల స్థలాలు, కడప శివారున 1.12 ఎకరాల ఖాళీ స్థలం ఉన్నట్టు గుర్తించారు. అలాగే బంగారం, వెండి సీజ్ చేశారు. ఆయన అక్రమాస్తులపై విచారణ కొనసాగుతుందన్నారు. కీలకమైన డాక్యుమెంట్లను ఏసీబీ అధికారులు స్వాధీనం చేసుకున్నట్లు తెలుస్తోంది.