ఇలాగైతే అధికారుల్ని పిలవాల్సి ఉంటుంది.. ఏపీ హైకోర్టు సీరియస్ కామెంట్స్

జగన్ సర్కార్‌పై సీరియస్ కామెంట్స్ చేసింది. 2018-19లో ఉపాధి హామీ పథకం కింద చేపట్టిన పనులకు బకాయిలు చెల్లించకపోవడంపై ఆగ్రహం వ్యక్తం చేసింది. పనులే చేయకపోతే కూలీలకు సొమ్ము ఎలా చెల్లించారని ప్రశ్నించింది. 2018-19 చేసిన పనులకు ఇవ్వకుండా ఆ తర్వాత చేసిన పనులకు ఎలా చెల్లిస్తారని అడిగింది. కేంద్రం నుంచి నిధులు రాకపోతే 2019-20కు సంబంధించిన పనులకు బిల్లులెలా చెల్లించారని అడిగింది. రూ.5 లక్షల లోపు విలువ చేసే పనులకు 20% సొమ్మును మినహాయించి బకాయిలు చెల్లిస్తామని కోర్టుకు తెలిపినా.. ఎందుకు చెల్లించలేదని సీరియస్ అయ్యింది. ప్రభుత్వ తీరును తప్పుబట్టిన హైకోర్టు ప్రధాన న్యాయమూర్తి జస్టిస్‌ ఏకే గోస్వామి, జస్టిస్‌ సి.ప్రవీణ్‌కుమార్‌తో కూడిన ధర్మాసనం.. ఇదే ధోరణి కొనసాగితే ఉన్నతాధికారులను కోర్టుకు పిలిపించాల్సి ఉంటుందని హెచ్చరించింది. చెల్లింపు వివరాలు కోర్టుకు తెలిపేందుకు విచారణను ఏప్రిల్‌ 23కు వాయిదా వేసింది. తదుపరి విచారణ నాటికి కోర్టుకు ఇచ్చిన హామీ మేరకు బకాయిలు చెల్లించాలని ఆదేశించింది. 2018-19లో ఉపాధి హామీ పథకం కింద చేపట్టిన పనులకు బకాయిలు చెల్లించకపోవడాన్ని సవాలు చేస్తూ హైకోర్టులో పిటిషన్లుదాఖలయ్యాయి. పిటిషనర్ల తరఫున సీనియర్‌ లాయర్లు వాదనలు వినిపించారు.