రైలు ఢీకొనడంతో ఓ యువకుడి మృతదేహం పట్టాలపై చిధ్రమై కనిపించింది. దీంతో ప్రయాణికులు అక్కడ గుమిగూడి సెల్‌ఫోన్లో వీడియోలు తీస్తున్నారు. వారితో పాటు ఓ బాలిక కూడా అక్కడ ఫోటోలు తీసింది. మృతదేహంపై ఉన్న దుస్తులు తన అన్నని అనే అనుమానం కలిగింది. విషయం తల్లికి చెప్పడంతో హుటాహుటీన రైలు దిగి మృతదేహం వద్దకు వెళ్లి చూడగా వారి అనుమానమే నిజమైంది. అప్పటి వరకు తమతో ఉన్న కుమారుడు విగతజీవిగా కనిపించడంతో ఆ తల్లిదండ్రులు కన్నీరుమున్నీరుగా విలపించారు. Also Read: మంచిర్యాల జిల్లా మందమర్రిలోని సింగరేణి వర్క్‌షాప్‌లో పనిచేస్తున్న ఏడుకోల శ్రీనివాస్ భార్య రాణి కుమారుడు విశాల్(21), కూతురుతో కలిసి స్థానికంగా నివసిస్తున్నాడు. కుమార్తె హైదరాబాద్‌లో చదువుకుంటోంది. విద్యాసంస్థలను ప్రభుత్వం మూసివేయడంతో ఆమెను తీసుకొచ్చేందుకు కుటుంబమంతా శనివారం హైదరాబాద్‌కు వచ్చారు. రెండ్రోజుల పాటు బంధువుల ఇంట్లో బస చేసి సోమవారం మందమర్రికి తిరుగు ప్రయాణమయ్యారు. కాగజ్‌నగర్‌ ఎక్స్‌ప్రెస్‌లో ప్రయాణిస్తుండగా సంపర్క్ క్రాంతి ఎక్స్ప్రెస్ క్రాసింగ్‌ కోసం వీరు ప్రయాణిస్తున్న రైలును స్టేషన్‌లో నిలిపివేశారు. అదే సమయంలో మంచినీళ్ల కోసం రైలు దిగిన విశాల్ ప్లాట్‌ఫామ్‌ వైపు నడుచుకుంటూ వెళ్తుండగా సంపర్క్ క్రాంతి ఎక్స్ప్రెస్ ఢీకొట్టి వెళ్లిపోయింది. ఈ విషయం తెలియని విశాల్ తల్లిదండ్రులు, చెల్లి అతడు ఇంకా రైలెక్కడం లేదని ఎదురుచూస్తున్నారు. ఈలోపే యువకుడిని రైలు ఢీకొందని తెలుసుకున్న ప్రయాణికులు గుమిగూడారు. అక్కడ ఫోటోలు తీసేందుకు వెళ్లిన బాలిక చనిపోయింది తన అన్నయ్యే అని తెలుసుకుని తల్లిదండ్రులకు చెప్పడంతో వారు షాకయ్యారు. మృతుడి కుటుంబ సభ్యుల ఫిర్యాదు మేరకు రామగుండం జీఆర్పీ హెడ్‌కానిస్టేబుల్‌ తిరుపతి కేసు నమోదు చేశారు. మరోవైపు కన్నకొడుకు కళ్లముందే విగతజీవిగా కనిపించడంతో తండ్రి శ్రీనివాస్ తట్టుకోలేకపోయాడు. పెద్దపల్లి ప్రభుత్వ ఆసుపత్రిలో పోస్టుమార్టం అనంతరం రాత్రి విశాల్ మృతదేహాన్ని మందమర్రికి తీసుకువచ్చారు. కొడుకు ఇకలేడన్న మనస్తాపంతో శ్రీనివాస్ అనారోగ్యానికి గురవడంతో వెంటనే సింగరేణి డిస్పెన్సరీకి తరలించారు. రెండు గంటల పాటు చికిత్స అందించిన తర్వాత డాక్టర్లు ఆయన్ని డిశ్చార్జి చేశారు.
0 Comments