టీటీడీ కల్యాణమస్తు: ప్రతి నియోజకవర్గంలో వివాహాలు.. దరఖాస్తు ఇలా, పూర్తి వివరాలివే

కల్యాణమస్తుకు సంబంధించి మరో కీలక నిర్ణయం తీసుకుంది. ఈ సామూహిక వివాహాల కార్యక్రమాన్ని ప్రతి నియోజకవర్గంలో నిర్వహించేందుకు ఏర్పాట్లు చేయాలని ఈవో డాక్టర్‌ కేఎస్‌ జవహర్‌రెడ్డి అధికారులను ఆదేశించారు. నిర్వహణపై అధికారులతో సమీక్ష నిర్వహించిన ఆయన.. కీలక విషయాలను వెల్లడించారు. మే 28న మధ్యాహ్నం 12.34 నుంచి 12.40 గంటల మధ్య సామూహిక వివాహాలు నిర్వహించాలని టీటీడీ నిర్ణయించిందన్నారు. కరోనా వ్యాప్తి చెందే ప్రమాదం ఉందని.. జిల్లా కేంద్రాల్లో ఒక్క చోటే కల్యాణమస్తు నిర్వహిస్తే ప్రమాదం ఉందన్నారు. అందుకే ప్రతి నియోజకవర్గంలో వేదికలు ఏర్పాటు చేయాలన్నారు. కల్యాణమస్తు కార్యక్రమానికి జిల్లా కలెక్టర్ల సహకారం కోరుతూ లేఖలు రాయాలని అధికారులను ఈవో ఆదేశించారు. ప్రతి జిల్లాలో కనీసం 300 జంటలకు వివాహాలు చేసేలా చర్యలు తీసుకోవాలన్నారు. దీని కోసం జంటల నమోదు ప్రక్రియను వెంటనే ప్రారంభించాలన్నారు. వివాహం చేసుకునే జంటలకు రెండు గ్రాముల మంగళ సూత్రం, వస్త్రాలు, వెండి మెట్టెలు, పుస్తక ప్రసాదం, శ్రీపద్మావతి శ్రీనివాసుల ల్యామినేషన్‌ ఫోటో, భోజన ఏర్పాట్లు సిద్ధం చేయాలన్నారు. మరోవైపు కల్యాణమస్తు సామూహిక వివాహాలకు సంబంధించి యువతీ, యువకుల నుంచి దరఖాస్తులు ఆహ్వానిస్తున్నట్లు టీటీడీ ప్రకటనలో తెలిపింది. రాష్ట్రవ్యాప్తంగా నియోజకవర్గాలవారీగా ఈ కార్యక్రమాన్ని నిర్వహించనుంది. ఇందుకు సంబంధించిన విధివిధానాలు, దరఖాస్తుపత్రాలను www.tirumala.org నుంచి పొందవచ్చని తెలిపింది.