జనసేన అధినేత పవన్ కళ్యాణ్‌పై పీఏసీ ఛైర్మన్ సంచలన వ్యాఖ్యలు చేశారు. అసెంబ్లీ ఎన్నికల్లో జనసేన, ఉమ్మడి సీఎం అభ్యర్థి ముమ్మాటికీ పవన్ అన్నారు. ఆదివారం రాత్రి జరిగిన జనసేన, బీజేపీ సమన్వయ సమావేశంలో పవన్ నాయకత్వాన్ని ప్రధాని మోదీ, అమిత్‌షా ధ్రువీకరించారని బీజేపీ రాష్ట్ర అధ్యక్షుడు సోమువీర్రాజు అన్న మాటలను స్వాగతిస్తున్నామన్నారు. తిరుపతిలో సోమవారం జరిగిన జనసేన క్రియాశీలక సభ్యుల సమావేశంలో ఈ వ్యాఖ్యలు చేశారు. ప్రజల సంక్షేమం కోసం రాబోయే రోజుల్లో రాష్ట్రానికి ముఖ్యమంత్రిగా జనసేనాని సేవలు ఎంతో అవసరమన్నారు. 2024 ఎన్నికల్లో బీజేపీ, జనసేనపార్టీల ఉమ్మడి సీఎం అభ్యర్థిగా పవన్‌ను బీజేపీ అధిష్ఠానం ప్రకటించడం శుభపరిణామం అన్నారు. బీజేపీతో పొత్తుకు కట్టుబడి తిరుపతి లోకసభ ఉప ఎన్నికల్లో ఆ పార్టీ అభ్యర్థి రత్నప్రభ గెలుపునకు కృషి చేయాలన్నారు మనోహర్. వైఎస్సార్‌సీపీ అరాచక పాలనను ఎండగట్టాలంటే బీజేపీని గెలిపించుకోవాల్సిన అవసరం ఉందన్నారు. వచ్చేవారం తిరుపతిలో పవన్ కళ్యాణ్ రోడ్‌ షోతో పాటు బహిరంగ సభ నిర్వహించనున్నట్లు తెలిపారు. రాష్ట్రంలో టీడీపీ అంతరించిపోయిందని.. రానున్న రోజుల్లో జనసేన, బీజేపీ కలసి ప్రజాసమస్యల మీద పోరాటం చేస్తాయన్నారు నాదెండ్ల.
0 Comments