పట్టపగలే నడిరోడ్డుపై పిల్లలు.. ఏం చేస్తున్నారో తెలిస్తే షాక్ అవ్వాల్సిందే

ఎండలు ముదురుతున్నాయి. పిల్లలతో పాటు పెద్దలు కూడా ఎండలకు భయపడి బయటకు రాలేని పరిస్థితి. వేడికి భయపడి కొందరు ఇంట్లోనే ఉంటున్నారు. కానీ.. వరంగల్‌లో పిల్లలు బెంబేలెత్తిస్తున్నారు. అపార్ట్‌మెంట్లు, సామాన్యుల ఇళ్లను టార్గెట్ చేసి సైకిళ్ళు మాయం చేస్తున్నారు.. రోజుకో చోట సైకిళ్ళ దొంగతనాలు జరగడం ఇప్పుడు నగరంలో ఆందోళన కలిగిస్తున్న అంశం. సైకిల్ దొంగతనంపై పోలీసులకు పిర్యాదు చేయడాన్ని బాధితులు చులకనగా భావిస్తుంటే.. ఇదే అదునుగా సైకిల్ చోరీలకు పాల్పడుతున్నారు. అయితే ఈ చోరీలకు పాల్పడేది అంతా 12ఏళ్ల లోపు పిల్లలే. పైగా సైకిల్ పోయిందని పోలీసులకు ఫిర్యాదు చేస్తే అవమానకరంగా ఉంటుందనే భావన. దీంతో ఎవరూ బయటికి చెప్పుకోవడం లేదు. ఈ మధ్యే హన్మకొండ బస్టాండ్ సమీపంలోని ఓ అపార్ట్ మెంట్ లో, అడ్వకేట్స్‌ కాలనీ లోని అపార్ట్‌మెంట్‌లో పట్టపగలే సైకిళ్ళు అపహరించుకు పోయారు. వరుసగా రెండు సార్లు వచ్చి దర్జాగా సైకిళ్ళు మాయం చేశారు. సైకిల్ మాయమైన ప్రతిసారి సీసీ కెమెరా దృశ్యాలు చూసి నోరెళ్ల బెట్టడం తప్ప… ఏం చేసే పరిస్థితి లేదు. పిల్లల సైకిల్లే కాదు పెద్దవారు కూడా ఉదయాన్నే సైక్లింగ్ కోసం ఉపయోగించే సైకిళ్లను కూడా దొంగిలిస్తున్నారు. దీంతో ఇప్పటికే సైకిళ్ళు చోరీలకు గురైన వారు ఆందోళన చెందుతున్నారు.. ఇలాంటి పిల్ల దొంగలను క్షమిస్తే పెద్దయ్యాక పెద్దపెద్డ నేరాలు, దొంగ తనాలకు పాల్పడే అవకాశం ఉందని వారిపై చర్యలు తీసుకోవాలని కోరుతున్నారు. వరంగల్, హన్మకొండ, కాజీపేట ట్రై సిటీస్ పరిధిలో పదుల సంఖ్యలో సైకిళ్ళు మాయం చేశారు. స్కూళ్ళు మూతపడడంతో జల్సాలకు అలవాటు పడ్డ పిల్లలే ఇలాంటి చోరీలకు పాల్పడుతున్నారని భావిస్తున్న పోలీసులు… ఈ బాల దొంగలపై నిఘా పెట్టారు.