నడిరోడ్డుపై మహిళ ప్రసవం... కన్నపేగు కత్తిరించేవారు లేక

ప్రభుత్వాలు పేదల వైద్యం కోసం ఎన్ని చర్యలు చేపడుతున్నా... సకాలంలో సరైన వైద్యం అందక నేటికే అనేక ప్రాణాలు గాల్లో కలిసిపోతున్నాయి. తల్లి కడుపులో ఎనిమిదినెలల పాటు ఎదిగిని ప్రాణం... బయటకు రాగానే ఈ లోకాన్ని విడిచి వెళ్లింది. హైదరాబాద్‌ నగరానికి కూతవేటు దూరంలోగల జవహర్‌నగర్‌ మున్సిపల్‌ కార్పొరేషన్‌ పరిధిలో ఈ విషాదకరమైన ఘటన చోటు చేసుకుంది. ఓ నిరుపేద గర్భిణి రోడ్డుపైనే బిడ్డను ప్రసవించింది. తీవ్ర ప్రసవ వేదనను అనుభవిస్తూ శిశువుకు జన్మనిచ్చినప్పటికీ కనీసం తల్లి నుంచి శిశువును వేరు చేసేందుకు పేగును కత్తిరించేవారు అక్కడ లేరు. దీంతో ఆ పసి ప్రాణం కొద్ది నిమిషాల్లోనే తుదిశ్వాస విడిచింది. ఈ విషాదకరమైన జవహర్‌నగర్‌లోని ప్రభుత్వ ఆసుపత్రి పక్కనే జరగడం గమనార్హం. వివరాల్లోకి వెళ్తే... మేడ్చల్‌కు చెందిన లక్ష్మి 8 నెలల గర్భిణి. కొంత కాలంగా ఆమె కాలి గాయంతో బాధపడుతోంది. తీవ్రమైన నొప్పితో ఆమె చికిత్స కోసం సోమ వారం ఉదయం 11.30 గంటలకు జవహర్‌నగర్‌ అర్బన్‌ హెల్త్‌ సెంటర్‌కు చేరుకుంది. ఆసుపత్రి ఆవరణలో ఉన్న బెంచ్‌పై కూర్చొని ఉండగా కాలి గాయం నుంచి చీము కారుతుండటాన్ని ఫార్మసిస్ట్‌ గమనించింది. ఇదే అంశాన్ని స్టాఫ్‌ నర్సు సుశీలకు వివరించింది. గాయానికి డ్రెసింగ్‌ చేయాల్సిందిగా కోరింది. అయితే హోలీ సందర్భంగా సెలవు కావడంతో డ్రెసింగ్‌ చేయడం కుదరదని, మంగళవారం ఉదయం వస్తే చేస్తామని చెప్పింది. దీంతో నొప్పి నుంచి ఉపశమనం కోసం లక్ష్మీకి పెయిన్‌ కిల్లర్‌ మందులు ఇచ్చి పంపారు. దీంతో లక్ష్మి మధ్యాహ్నం 12 గంటల సమయంలో ఆసుపత్రి నుంచి బయటికి వెళ్లింది. కాగా, నీరసంతో ఉన్న ఆమె ఆసుపత్రి సమీపంలోని రోడ్డుపై స్పృహ తప్పి పడిపోయింది. ఈ క్రమంలో మధ్యాహ్నం 2 గంటల సమయంలో రోడ్డుపైనే మగబిడ్డకు జన్మనివ్వడాన్ని స్థానికులు గమనించి వెంటనే పోలీసులకు, 108కు సమాచారం ఇచ్చారు. వైద్య సిబ్బంది అక్కడికి చేరుకుని పేగును కత్తిరించి తల్లి నుంచి బిడ్డను వేరు చేశారు. అయితే అప్పటికే శిశువు చనిపోయి ఉన్నట్లు గుర్తించారు. స్పృహతప్పి పోయిన ఆ బాలింతను మెరుగైన వైద్యం కోసం గాంధీకి తరలించారు. ప్రస్తుతం లక్ష్మీకి ఎమర్జెన్సీ విభాగంలో వైద్యసేవలు అందిస్తున్నారు.