మూడునెలలకే నవ వధువు మృతి.. ఇంట్లోనే ఊహించని ప్రమాదం

పెళ్లైన మూడు నెలలకే నవ వధువు మృతిచెందిన విషాదకరమైన ఘటన చోటు చేసుకుంది. ఆమె చేసిన చిన్న పొరపాటే ప్రాణం బలితీసుకుంది. ఈ దుర్ఘటన మెదక్ జిల్లాలోని ఆదివారం రోజున చోటుచేసుకుంది. బాధిత యువతి తండ్రి ఫిర్యాదుతో పోలీసులు కేసు నమోదు చేశారు. పోలీసులు తెలిపిన వివరాల ప్రకారం... మనోహరాబాద్‌ మండలం దండుపల్లికి చెందిన కనిగిరి నర్సింలు రెండో కూతురు శిరీష(20)ను శివ్వంపేట మండలం గంగాయిపల్లికి చెందిన ఒగ్గు దశరథ కుమారుడు ప్రసాద్‌కు ఇచ్చి వివాహం చేశారు. ఈ ఏడాది జనవరి 10వ తేదీన వీరి పెళ్లి జరిగింది. అయితే కోటి ఆశలతో అత్తింట అడుగుపెట్టిన శిరీషను అనుకోని ప్రమాదం బలితీసుకుంది. హోలీ పండగ కావడంతో ఆదివారం తెల్లవారుజమున శిరీష ఇంటి పనుల్లో బిజీ అయ్యింది. ఈ క్రమంలోనే వేడి నీటి కోసం ఓ బకెట్‌లో వాటర్ హీటర్ పెట్టింది. ఆ తర్వాత మరో బకెట్‌లో నీటిని తీసుకుని వచ్చి ఇళ్లును శుభ్రం చేస్తుంది. అయితే శిరీష పొరపాటు హీటర్ ఉంచిన బకెట్‌లో నుంచి నీరును తీసేందుకు మగ్గును ముంచింది. అంతే అక్కడే షాక్‌కు గురై కుప్పకూలింది. వెంటనే ఆమెను కుటుంబ సభ్యులు ఆస్పత్రికి తరలించారు. మేడ్చల్‌లోని ఓ ఆస్పత్రికి తరలించగా.. అప్పటికే ఆమె మృతిచెందినట్టు డాక్టర్లు చెప్పారు. శిరీష తండ్రి నర్సింలు ఫిర్యాదుతో కేసు నమోదు చేసినట్టు ఎస్సై రమేశ్ తెలిపారు. పెళ్లైన మూడునెలలకే యువతి మృతితో ఇరు కుటుంబాల్లో తీవ్ర విషాద ఛాయలు అలుముకున్నాయి.