ఏపీ ముఖ్యమంత్రి వైఎస్ జగన్‌మోహన్‌రెడ్డి కొవిడ్ వ్యాక్సిన్ తీసుకోనున్నారు. ఏప్రిల్ 1న గుంటూరులో సీఎం టీకా వేయించుకోనున్నారు. అమరావతి రోడ్డులోని భారత్‌పేట 140వ వార్డు సచివాలయంలో ఉదయం 11.10 గంటలకు సీఎం పేరు నమోదు చేయించుకుంటారు. 11.25 గంటలకు వ్యాక్సిన్ వేయించుకుంటారు. ఆ తర్వాత నిబంధనల ప్రకారం.. వైద్యుల పర్యవేక్షణలో అరగంటపాటు అక్కడే ఉంటారు. సచివాలయం, వైద్య సిబ్బందితో ముఖ్యమంత్రి సమావేశమవుతారు. వ్యాక్సినేషన్ సెంటర్‌ను ఎంపీ మోపిదేవి వెంకట రమణ పరిశీలించారు. ఆర్థిక భారం పడుతున్నా కొవిడ్ నియంత్రణకు అన్నిచర్యలు చేపట్టామన్నారువ్యాక్సినేషన్‌లో ముందున్నామని.. రాష్ట్రంలో ఏప్రిల్ 1 నుంచి సచివాలయాల్లో వ్యాక్సిన్లు అందుబాటులోకి తెస్తున్నామన్నారు. ప్రజల్లో అపోహలు తొలగాలి, ప్రభుత్వ సలహాలు, సూచనలు పాటించాలని కోరారు. వ్యాక్సినేసన్ తర్వాత ముఖ్యమంత్రి 11.55 గంటలకు గుంటూరు నుంచి బయలుదేరి 12.35 గంటలకు తాడేపల్లిలోని తన నివాసానికి చేరుకుంటారు. మధ్యాహ్నం 2.50 గంటలకు సీఎం తన నివాసం నుంచి బయలుదేరి 3 గంటలకు విజయవాడలోని ఏ–కన్వెన్షన్‌ సెంటర్‌లో జరిగే కార్యక్రమానికి హాజరవుతారు. అక్కడ 3.25 గంటల వరకు మేయర్లు, డిప్యూటీ మేయర్లు, పురపాలక చైర్మన్లు, వైస్‌ చైర్మన్ల ఓరియెంటేషన్‌ ప్రోగ్రామ్‌లో పాల్గొంటారు. అనంతరం రోడ్డు మార్గం ద్వారా 3.35 గంటలకు తాడేపల్లిలోని తన నివాసానికి చేరుకుంటారు.
0 Comments