పెద్దపల్లి పోలీసుల కొరడా... మాస్క్ పెట్టుకోలేదని 11మంది అరెస్ట్

తెలంగాణలో కరోనా మహమ్మారి మళ్లీ కోరలు చాస్తుండటంతో అధికార యంత్రాంగం అప్రమత్తమైన సంగతి తెలిసిందే. దీంతో బహిరంగ ప్రదేశాల్లో సంచరించే వారు కచ్చితంగా మాస్కులు ధరించాలని నిబంధన విధించారు. దీన్ని అతిక్రమించిన వారికి భారీ జరిమానాతో పాటు జైలుకు కూడా పంపుతామని పోలీసులు హెచ్చరిస్తూనే ఉన్నా.. కొందరు మాత్రం అస్సలు పట్టనట్లు వ్యవహరిస్తున్నారు. దీంతో రాష్ట్రవ్యాప్తంగా స్పెషల్ డ్రైవ్‌లు చేపడుతున్న పోలీసులు మాస్క్ ధరించని వారిపై కఠినచర్యలు తీసుకుంటున్నారు. ఈ నేపథ్యంలోనే జిల్లా పోలీసులు మాస్క్ ధరించలేదన్న కారణంతో 11 మందిని అరెస్ట్ చేసి షాకిచ్చారు. సుల్తానాబాద్‌ మండలంలో స్పెషల్ డ్రైవ్ చేపట్టిన పోలీసులు మాస్క్‌ లేకుండా తిరుగుతున్న 11 మందిని మంగళవారం అరెస్ట్ చేసి కేసు నమోదు చేశారు. వీరందరినీ ఈరోజు మంథని కోర్టులో హాజరుపరచనున్నారు. మాస్కులు ధరించలేదని అరెస్టులు చేసిన ఈ ఘటనలు హైదరాబాద్‌ సహా రాష్ట్రంలో ఎక్కడా జరగలేదు. ఇప్పటివరకు వార్నింగులు, జరిమానాలతోనే సరిపెట్టిన పోలీసులు.. మాస్క్ ధరించని వారిపై మరింత కఠినంగా వ్యవహరిస్తామని ఈ ఘటన ద్వారా ప్రజల్లోకి స్ట్రాంగ్ మెసేజ్‌ తీసుకెళ్లారు. మాస్క్ పెట్టుకోవాలని ఎన్నిసార్లు చెప్పినా కొందరిలో మార్పు రావడం లేదని, ఇలా చేయడం వల్లనైనా మార్పు వస్తుందని ఆశిస్తున్నామని పోలీసులు చెబుతున్నారు. రాష్ట్రంలో కరోనా సెకండ్ వేవ్ కొనసాగుతున్న వేళ ఇటీవలే ప్రభుత్వం కొన్ని నిబంధనలు విధించింది. మాస్కులు ధరించడం తప్పనిసరి చేస్తూ పంక్షన్లు, ఇతర కార్యక్రమాలపైనా ఆంక్షలు విధించింది. మాస్కులు ధరించని వారిపై డిజాస్టర్ మేనేజ్‌మెంట్ చట్టం, ఐపీసీ సెక్షన్ల కింద చర్యలు తీసుకుంటామని స్పష్టం చేసింది.