కర్నూలు జిల్లాలో బాలిక సమయస్ఫూర్తితో వ్యవహరించి తల్లి ప్రాణాలు నిలబెట్టింది. గుడ్‌షెపర్డ్‌ పాఠశాలలో పీఈటీగా పనిచేస్తున్న వెంకటేశ్వర్లుకు అక్క కూతురు సుజాతతో వివాహమైంది. పాఠశాలలో పనిచేస్తూ, చీటీల వ్యాపారం నిర్వహిస్తూ కుటుంబాన్ని పోషించేవారు. దంపతులకు ముగ్గురు కుమార్తెలు. వెంకటేశ్వర్లు వేరే మహిళలతో వివాహేతర సంబంధం పెట్టుకుని నాలుగేళ్ల క్రితం ఇంటి నుంచి వెళ్లిపోయాడు. సుజాత పిల్లలతో కలిసి హౌసింగ్‌ బోర్డు కాలనీలోనే నివాసం ఉంటున్నారు. ఇంటికి సంబంధించి రూ.12 లక్షల రుణం ఉంది.. బ్యాంకు అధికారులు డబ్బులు తిరిగి చెల్లించమని సుజాతపై ఒత్తిడి చేశారు. ముగ్గురు పిల్లల్ని పోషించలేక ఇబ్బందిపడుతోంది.. రుణం చెల్లించే దారి కనిపించకపోవడంతో సుజాత మనస్తాపం చెందింది. ఆదివారం ఉదయం విషం తాగి ఆత్మహత్యాయత్నం చేసింది. ఏడో తరగతి చదువుతున్న పెద్ద కుమార్తె సబిత వెంటనే అప్రమత్తం అయ్యింది. గతంలో స్కూల్లో 100కు ఫోన్ చేయాలని చెప్పిన విషయాన్ని గుర్తు చేసుకుంది. వెంటనే 100కు ఫోన్ చేసింది.. తన తల్లి గురించి సమాచారం ఇచ్చింది. వెంటనే అక్కడికి వచ్చిన పోలీసులు సుజాతను ప్రభుత్వ ఆసుపత్రిలో చేర్పించారు. ప్రస్తుతం ఆమె చికిత్స పొందుతున్నారు. 2018లోనే భర్తపై ఆమె స్థానిక రెండో పట్టణ పోలీస్‌స్టేషన్‌లో కేసు పెట్టారు. కేసు కోర్డులో ఉండటంతో, ఇబ్బందుల్లో ఏం చేయాలో తెలియక ఆత్మహత్యకు పాల్పడ్డానని బాధితురాలు తెలిపారు. బాలిక సకాలంలో స్పందించి పోలీసులకు సమాచారం ఇవ్వడంతో తల్లిని సమయానికి ఆస్పత్రిలో చేర్చారు. బాలికను అందరూ అభినందించారు.
0 Comments