నరసాపురం ఎంపీ రఘురామకృష్ణరాజు హోంమంత్రి అమిత్‌షాతో భేటీ అయ్యారు. పార్లమెంటు భవన్‌లో షాతో సమావేశమైన ఆయన.. రాష్ట్రానికి సంబంధించిన అంశాలపై చర్చించారు. ఏపీలో పరిస్థితులు, అమరావతి రైతుల మహా పాదయాత్ర, రాష్ట్ర ఆర్థిక పరిస్థితి అంశాలను అమిత్‌షాకు వివరించినట్లు తెలుస్తోంది. అమరావతికి మద్దతు ఇవ్వడంపై రఘురామ ధన్యవాదాలు తెలిపారట. జగన్ సర్కార్ తీరుపై ఫిర్యాదులు చేసినట్లు తెలుస్తోంది. ప్రభుత్వం అనుసరిస్తున్న ఆర్థిక క్రమశిక్షణారాహిత్యం వల్ల ఆర్థికంగా రాష్ట్రం దివాళా తీస్తోందని చెప్పారట. రఘురామ కూడా కొద్దిరోజులుగా ఏపీ ఆర్థిక పరిస్థితి, అప్పుల వ్యవహారంపై జగన్ సర్కార్‌ను టార్గెట్ చేస్తున్నారు. అవే అంశాలను ప్రధానంగా అమిత్ షా దగ్గర ప్రస్తావించినట్లు తెలుస్తోంది. రాష్ట్ర ప్రభుత్వం వరుసగా అప్పుల చేస్తోందని.. కేంద్రం ఇచ్చిన మార్గదర్శకాలను ఉల్లంఘిస్తున్నట్లు ఫిర్యాదు చేసినట్లు తెలుస్తోంది. ఇటీవల వచ్చిన కాగ్ రిపోర్ట్‌ను కూడా రఘురామ అమిత్ షా దగ్గర ప్రస్తావించినట్లు సమాచారం. మూడు రాజధానుల బిల్లులు వెనక్కి తీసుకోవడంపైనా చర్చ జరిగిందట. అమిత్ షాతో సమావేశమయ్యానని.. రాష్ట్రంలో పరిణామాలపై చర్చించినట్లు ఎంపీ రఘురామ ట్వీట్ చేశారు. షాకు బిజీ షెడ్యూల్ ఉన్నా సరే తనకు కొంత సమయం కేటాయించినందుకు ధన్యవాదాలు తెలిపారు.
0 Comments