ఏపీ గవర్నర్‌కు మరోసారి అస్వస్థత.. ప్రత్యేక విమానంలో హైదరాబాద్‌కు..

కరోనా నుంచి కోలుకున్న ఆంధ్రప్రదేశ్ రాష్ట్ర గవర్నర్ బిశ్వభూషణ్ హరిచందన్ మళ్లీ అస్వస్థతకు గురయ్యారు. దీంతో ఆయన్ను ప్రత్యేక విమానంలో హైదరాబాద్‌కు తరలించారు. ఈ నెల 17వ తేదీన కరోనా పాజిటివ్‌తో గచ్చిబౌలిలోని ఏఐజీ ఆస్పత్రిలో చేరిన ఆయన.. పూర్తి ఆరోగ్యంతో 23వ తేదీన డిశ్చార్జ్ అయ్యారు. అయితే ఈ రోజు రాత్రి ఆయన మళ్లీ అస్వస్థతకు గురవ్వడంతో ప్రత్యేక విమానంలో మరోసారి హైదరాబాద్ తరలించారు. 88 ఏళ్ల వయసున్న గవర్నర్‌ హరిచందన్‌ నవంబర్ 15వ తేదీన కోవిడ్ పాజిటివ్‌గా తేలడంతో.. 17వ తేదీ మధ్యాహ్నం ఒంటి గంటకు గచ్చిబౌలిలోని ఏఐజీ హాస్పిటల్‌లో చేరారు. పూర్తిగా కోలుకున్న తర్వాత 23వ తేదీ డిశ్చార్జ్ అయ్యి.. మళ్లీ విజయవాడ చేరుకున్నారు. అయితే వారం రోజుల్లోనే ఆయన మరోసారి అస్వస్థతకు గురవడంతో హైదరాబాద్‌లోని ఏఐజీ ఆస్పత్రికి తరలించారు. ఒడిశాకు చెందిన బిశ్వభూషణ్ 2019 జూలై నుంచి ఏపీ గవర్నర్‌గా వ్యవహరిస్తున్నారు. ప్రస్తుతం ఆయన వయసు 88 ఏళ్లు. 1971లో జన సంఘ్‌లో చేరిన బిశ్వభూషణ్.. ఐదుసార్లు ఎమ్మెల్యేగా ఎన్నికయ్యారు. 2004-09 మధ్య ఒడిశా మంత్రిగానూ పని చేశారు. ఆయన రాజకీయ నాయకుడిగానే కాకుండా లాయర్‌గా, రచయితగానూ గుర్తింపు పొందారు.